Oրերս «Գասպարյան արտ-ստուդիայում» բացվեց «Աշխարհը մանուկների աչքերով» խորագրով ցուցահանդես, որտեղ ցուցադրվեցին ստուդիայի 4,5-15 տարեկան սաների 50-ից ավելի՝ խառը տեխնիկայով արված հաստոցային եւ գեղանկարչական ստեղծագործություններ, գրաֆիկա (տպագրական եւ հաստոցային գրաֆիկա) կոմպոզիցիոն աշխատանքներ եւ արտ-օբյեկտներ: «Մանուկները ներկայացրել են զարմանահրաշ աշխարհը` իրենց վառ եւ լուսավոր գույներով»,- ասաց «Գասպարյան արտ-ստուդիայի» փոխնախագահ, արվեստագիտության թեկնածու, նկարիչ Վահե Գասպարյանը:
Նա նշեց, որ երեխաները հաշվետու ցուցահանդեսին պատրաստվել են վեց ամիս: Մասնակիցների թվում էին 6-ամյա Մարիամ Ամիրջանյանը եւ 5- ամյա Ալինա Գրիգորյանը: Մարիամիկը ոգեւորված էր ցուցահանդեսին ներկայացրած իր գիրք-նկարներով՝ բաղկացած էին մի քանի էջից: Փոքրիկի մեկնաբանմամբ` կազմը բացվում է ծիածանով, ապա կոնֆետների աշխարհ, գույնզգույն ծաղիկների աշխարհ, այլմոլորակայինների աշխարհ, մարդուկների եւ ամենավերջին էջում Աստծո կերպարն էր:
Փոքրիկների նկարներում գերիշխում էր հատկապես վարդագույնը, ինչպես 5-ամյա Ալինա Գրիգորյանի երեւակայական աշխարհում իրենց ուրույն տեղը ունեին արքայադուստրերը:
ԱՐԵՎ ԲԱՐՍԵՂՅԱՆ
«Առավոտ»
04.06.2016