Եվրամիությունը նվազագույնը մինչև 2016թ. սեպտեմբեր հետաձգել է Վրաստանի, Ուկրաինայի և Կոսովոյի քաղաքացիների համար առանց վիզայի ռեժիմ սահմանելու մասին հարցը, տեղեկացնում է The Wall Street Journal-ը՝ հղում կատարելով եվրոպացի դիվանագետներին մոտ կանգնած սեփական աղբյուրներին։
Հոդվածում նշվում է, որ Վրաստանի դեպքում հարցը հետաձգելու գլխավոր պատճառը Գերմանիան է, որն անհանգստացած է Վրաստանում կազմակերպված հանցագործության խնդրով։ Մեր հարևան երկրի քաղաքացիներին Եվրամիության անդամ երկրներ առանց վիզայի մուտքի իրավունք շնորհելու մասով որոշ վերապահումներ են արտահայտել նաև Ֆրանսիայի իշխանությունները։
Ավելի վաղ՝ 2016թ. մայիսին, Եվրամիությանը մոտ կանգնած աղբյուրները հաղորդել են, որ Բրյուսելը մտադիր է կասեցնել Ուկրաինայի և Վրաստանի համար առանց վիզայի ռեժիմ սահմանելու գործընթացը։ Ուշագրավ է սակայն, որ 2016թ. մայիսի 25-ին Եվրախորհրդարանը խոստացել էր արագացնել Ուկրաինայի և Վրաստանի քաղաքացիների համար առանց վիզայի ռեժիմ սահմանելու գործընթացը։
