Գյումրեցի երիտասարդ դիզայներն այս սկզբունքին է դավանում
Բոլոր հասարակարգերում հագուստը որոշիչ է եղել անձի զբաղեցրած դիրքի, մասնագիտության, ունեցվածքի, ճաշակի, տրամադրության առումով: Հայերս ասացվածք էլ ունենք. շոր տուր՝ շնորհք տամ: Օրինակ, Ռուսաստանի հանրային հեռուստատեսությամբ վերջին տասնամյակում շաբաթը 5 անգամ հեռարձակվում է Модный приговор հաղորդաշարը: Սա խոսում է այն մասին, որ երկիրն էլ է հասկանում, որ իր դեմքը նաեւ քաղաքացու հագուկապն է: Իսկ հագուստը մշտապես ենթադրում է նորաձեւություն, ինչն էլ իր հերթին՝ շոշափելի գումար:
Նորաձեւության ոլորտում հայտնի Վերսաչի ընտանիքի անդամները կարիերայի սկզբում նույնիսկ նվիրատվություններ են արել թե բարձրաշխարհիկ ընտանիքների անդամներին եւ թե շոու-բիզնեսի ներկայացուցիչներին: Հենց այս իտալացի կուտուրյեների օրինակով է առաջնորդվում հագուստի դիզայներ Միշա Պողոսյանը, որի անունը վերջին շրջանում շատ է հոլովվում Գյումրիում:
Կարդացեք նաև
«Առավոտի» հետ զրույցում նա ասաց. «Ստեղծագործական ոչ երկար ճանապարհիս սկզբում կենտրոնացել էի երեկոյան զգեստների վրա: Եթե նպատակս լիներ աշխատանքներիս իրացումը, բնականաբար, շուկայի պահանջների հետ հաշվի կնստեի: Բայց գյումրեցի կնոջ մեջ, որն իր ուսերին է կրում առօրյա հոգսերը, կարծես կորել է կամ խամրել բնատուր գեղեցկությունը: Սկզբնական շրջանում իսկապես դժվար էր աշխատել հաճախորդների հետ, որոնց մեջ կան ոչ միայն շարքային գյումրեցիներ, այլ հանրային դեմքեր եւս: Ես համառեցի, սկսեցի նույնիսկ հակառակվել նրանց, ինչը գոնե իմ դեպքում, բերեց, ինչպես ընդունված է ասել՝ շոշափելի արդյունքի»:
Հետաքրքրությանը՝ կոնկրետ պետական աջակցություն կամ ներդրում կա՞ իր աշխատանքում, դիզայները հավաստիացրեց, թե ցանկալի է, որ դա լինի, բայց այն չենթադրի պարտադրանք, ստեղծագործական շրջանակների սահմանափակում: Դիտարկմանը, թե Գեղարվեստի ակադեմիայի մասնաճյուղ գործում է նաեւ Գյումրիում, բայց եթե այսօր խոսք է գնում նորաձեւության մասին, ապա առաջինը հնչում է Միշայի անունը, արվեստագետը նախ նշեց, թե ոչ միայն Գյումրիում, այլ նաեւ Հայաստանում, ցավոք, գերակշռում է «սոված հասարակությունը», եւ այսօր խոսել բարձր նորաձեւության մասին՝ ծիծաղելի է: Այլ բան է, որ ընտրել ես այս ոլորտը եւ պետք է քայլ առ քայլ առաջ գնաս, ինչը կերեւա միայն համաքաղաքացիներիդ՝ ճաշակով ու նորաձեւ հագնվելու դեպքում:
Ինչ վերաբերում է Գեղարվեստի ակադեմիայի Գյումրիի մասնաճյուղի շրջանավարտ մոդելավորողներին, մեր զրուցակցի հավաստմամբ՝ նրանք դեռեւս չեն երեւում, գուցե բիզնես հմտություններին չտիրապետելու կամ պարզապես համարձակության պակասի պատճառով:
«Նորաձեւությունն էլ մեր երկրում երիտասարդ ոլորտ է: Ցավոք, Հայաստանում մոդա կոչվածը թելադրում է հիմնականում Թուրքիայից բերված գործվածքները, հենց դրանք են ձեւավորում գունային կամ նախշային մերօրյա պահանջները: Մինչդեռ քաղաքակիրթ երկրներում նորաձեւությունը առանձին կայացած, հզոր արդյունաբերություն է, որտեղ էլ ստեղծագործում են այդ գործի հանճարները: Եվ հենց կուտուրյեներն են իրենց մոտ թելադրում կտոր արտադրողին, իրացնողին, նրանք իրենց խոսքն ունեն ոչ միայն իրենց երկրի, այլեւ համաշխարհային նորաձեւության ասպարեզում: Պարզ է, որ հայերս չենք կարող օտարերկրացի կուտուրյեների օրինակով մեզ ճոխություն թույլ տալ:
Առավելագույնը, որ կարող ենք անել, դա մեր՝ դիզայներներիս ճաշակով գործվածքների ներկրումն է, որը դարձյալ մեծ ծախսեր է պահանջում, մանավանդ՝ սկսնակ դիզայների համար…»,- հայտնեց մասնագետը: Հետաքրքրվեցինք՝ ելնելով ձեր խոսքից՝ չունեք մեծ հնարավորություն, բայց մեզ հասած տեղեկություններով՝ նորաձեւությունը զուգահեռում եք մշակութային այլ արտադրությունով նույնպես: «Սեփական միջոցներով, իհարկե՝ ընտանիքիս աջակցությամբ, հիմնել եմ տիկնիկագործության արտադրություն եւ սեպտեմբերին մեր տիկնիկները կհայտնվեն հայկական շուկայում, իսկ հոկտեմբերին՝ ԱՄՆ-ում եւ Լեհաստանում: Նշեմ, որ մշակույթի տարբեր ոլորտներում գործող հայաստանցի որոշ արվեստագետների օրինակով արտասահմանյան այս գործունեությունը ես նույնպես իրականացնում եմ այնտեղ բնակվող ու ստեղծագործող ընկերներիս աջակցությամբ»:
Զրույցի ընթացքում Միշա Պողոսյանն ասաց, որ իր գործունեության ընթացքում առաջարկ եղել է մեկ մեծահարուստի կողմից, բայց մերժել է, քանի որ վերջինս թելադրել է իր պայմանները, ավելին՝ պնդել, որ երիտասարդը պետք է հիմնի սերիական արտադրություն: Միշայի ձեւակերպմամբ՝ նորաձեւության ոլորտում գերհասանելիությունը արժեք չի կարող տալ: Նա հավելեց նաեւ, թե իր սկզբունքն է՝ աշխատանքի դիմաց կամ թանկ վճարվի, կամ երբեմն պատրաստ է ստեղծագործել անվճար: Հավաստիացրեց, որ վերջին պայմանը հաճախ է կրկնվում իր թեեւ կարճ գործունեության ընթացքում, մանավանդ որ՝ այսօր գյումրեցի կինը չունենալով հնարավորություն, այնուամենայնիվ, ձգտում է ընդգծել իր անհատականությունը, կերպարը:
ՍԱՄՎԵԼ ԴԱՆԻԵԼՅԱՆ
«Առավոտ»
28.07.2016
