«Ռուսաստանը մեզ դարձրեց իր կցորդը, որպեսզի նույնիսկ մեր տարածաշրջանային հարցերում մեզ խաղից դուրս թողնեն: Ակնհայտ է դառնում, որ մենք իսկապես պիտի շուտափույթ կերպով ազատագրվենք մեզ համար կործանարար ՌԴ-ի գերիշխանությունից: Այսինքն, ուրիշ բաների մասին խոսելը, թե Սերժ Սարգսյանը սա չարեց, ընդդիմությունը սա չարեց՝ սրանք բոլորը ժամավաճառություն են»,- ԱԻՄ առաջնորդ Պարույր Հայրիկյանը մեզ հետ զրույցում այսպես պատասխանեց ՌԴ-Ադրբեջան-Իրան հանդիպումների եւ տարածաշրջանային նոր ձեւաչափի հետ կապված մեր հարցին, թե գնացքից դուրս չե՞նք մնացել:
Հայրիկյանի խոսքերով՝ մենք մի խնդիր ունենք, Հայաստանը պիտի դառնա իսկապես անկախ, իսկ ՌԴ-ից անկախացած երկրները դառնում են ՆԱՏՕ-ի անդամ կամ ՆԱՏՕ-ի դաշնակից. «Այլ ճանապարհ չկա, քաղաքակրթական ընտրության հարց չկա՝ կա՛մ Ռուսաստանի ստրուկն ես, կա՛մ ՆԱՏՕ-ի, ԵՄ-ի հետ սերտորեն աշխատող պետություն»:
Մեր դիտարկմանը, որ բոլոր հարցերում Պուտինին ենք մեղադրում, բայց մենք Իրանի հետ ունենք մեր հարաբերությունները, Պուտինն էլ կարող է ասել՝ թող ձեր երկրում կոռուպցիա չլիներ, երկաթգիծ կառուցեիք, ամեն ինչում մեղադրել իրե՞ն՝ Պարույր Հայրիկյանն արձագանքեց, որ Պուտինն արդեն դա ասում է. «Ցանկացած իմպերիալիստ միշտ այդպիսի մեղադրանքներ է ներկայացնում: Իսկ մենք այլ խնդիր ունենք՝ Պուտին, գնա քո տուն: Ամբողջ աշխարհն է նրան այդ բանն ասում, մենք էլ պետք է լինենք քաղաքակիրթ աշխարհի հետ»:
Ինչ վերաբերում է Իրանին, Պարույր Հայրիկյանն ասաց. «Իրանն էլ ուրիշ երկրների հետ ունի իր հարաբերութունները: Իրանը պետք է տեսնի՝ Հայաստանը որպես գործոն կա՞, թե՞ չկա: Երբ տեսնում է, որ չկա, էլ մեր գոռալը որեւէ իմաստ չունի: Եթե Հայաստանի էլեկտրացանցերը պատկանում են ՌԴ-ին, գազամատակարարման համակարգը եւ ընդհանրապես ողջ քաղաքականությունը ենթակա է ՌԴ-ին, եթե Իրանից ներկրվող ապրանքների վրա դրվում են Մոսկվայից սահմանած տուրքերը, Իրանը ինչո՞ւ պետք է մեզ լուրջ վերաբերվի: Իրանը մեզ կարող է լուրջ վերաբերվել եւ ինչ-որ չափով մեզ լուրջ գործընկեր համարել, եթե զգա, որ մենք կանք: Բայց երբ չկանք, առաջին հեթին պետք է պայքարենք լինելու համար»:
Կարդացեք նաև
Պարույր Հայրիկյանն ասաց, որ ամեն դեպքում ելք կա, պետք է կայանանք ու ասենք՝ «օտար նվաճողներ, դո՛ւրս այստեղից: Գնացքը դեռ չի գնացել, մենք դեռ ներուժ ունենք»:
Մեր հարցին՝ եթե իշխանությունը փոխվի, ինչ-որ բան կփոխվի՞՝ Պարույր Հայրիկյանը պատասխանեց. «Իհարկե, ոչ: Տեսեք, Լեւոն Տեր-Պետրոսյանը իշխանությունը տվեց, եթե ինքը հրաժարական էր տալիս, պիտի մինչեւ այդ կառավարությունը փոխանցեր, օրինակ, Վազգեն Մանուկյանին, այն ժամանակվա մեր թիմին: Բայց, եթե ինքը տվեց իր դրածո Ռոբերտ Քոչարյանին եւ իր կամակատար Վազգեն Սարգսյանին, իրենք իրար մեջ բաժանեցին իշխանությունը: Եթե Սերժ Սարգսյանն այսօր իշխանությունը տա որեւէ մեկին Դաշնակցությունից, ԲՀԿ-ից, այսինքն, ռուսական ստրուկներից որեւէ մեկին տա, դրանով բան չի փոխվում: ՌԴ-ի գերիշխանությունը ՀՀ-ում անհրաժեշտ համարողները բոլորը նույն թիմի մարդիկ են»:
Հռիփսիմե ՋԵԲԵՋՅԱՆ
