Իրանի մայրաքաղաք Թեհրանում հրդեհ է բռնկվել «Պլասկո» բարձրահարկ շինությունում, որի հետևանքով շենքը փլուզվել է: Ինչպես հաղորդում է Tansim գործակալությունը, վկայակոչելով տեղի իշխանություններին, շենքի փլատակների տակ է հայտնվել ավելի քան 30 մարդ:
Դեպքը տեղի է ունեցել տեղի ժամանակով առավոտյան ժամը 8-ի սահմաններում: Դեպքի վայր է ուղարկվել շուրջ 200 հրշեջ, որոնք 3.5 ժամ պայքարել են կրակի դեմ:
«Որոշ պաշտոնական ներկայացուցիչների հայտարարությունների համաձայն՝ շենքի փլուզման վայրում եղած 30 հրշեջներ, 2 թղթակիցներ և առևտրի կետերի մի քանի սեփականատերեր գտնվում են փլատակների տակ»,- ասվում է գործակալության հաղորդագրության մեջ:
Հաղորդվում է, որ կա նաև գազի արտահոսքի և պայթյունի հավանականություն, որի պատճառով մարդկանց խորհուրդ է տրվում լքել տարածքը: Հրդեհի և փլուզման հետևանքով, ըստ վերջին տեղեկությունների, տուժել է 38 մարդ:
Կարդացեք նաև
«Պլասկո» շենքը համարվում է Թեհրանի ամենաբարձր շինությունը: Այն կառուցվել է 1962թ. և ծառայում է որպես առևտրի կենտրոն:
Պատրաստեց՝ Վիկտորյա ԱՆԴՐԵԱՍՅԱՆԸ
