«Սկզբունքորեն, քայլը կատարված է, սպասում ենք հայտնվեն առաջին դիմում գրողները եւ արդեն հնարավոր կլինի անցկացնել թեստավորումը։ Սա եզակի երեւույթ է մեր իրականության մեջ, որը հնարավորություն կտա պատկերացում կազմել այն մարդկանց հայերենի իմացության մասին, ովքեր ամենատարբեր պատճառներով հայեցի կրթություն չեն ստացել», «Սպուտնիկ-Արմենիա» մամուլի ակումբում լրագրողների հետ հանդիպման ժամանակ ասաց ԿԳՆ Լեզվի պետական տեսչության պետ Սերգո Երիցյանը։
Հիշեցնենք, Նոր Ընտրական օրենսգրքով ԱԺ պատգամավորի թեկնածուի համար նախատեսված են հայերեն լեզվի քննություններ։ Հունվարի 30-ին հրապարակվել է պատգամավորի թեկնածուի հայերենի իմացությունը ստուգող թեստավորման առաջադրանքների հարցաշարը։ Թեստերը 214-ն են, յուրաքանչյուրում՝ 30 հարց: Թեստի անցողիկ շեմը 27-ն է:
«Մենք ձգտել ենք, որպեսզի թեստերում բարդ հարցեր չընդգրկենք», – ասաց Սերգո Երիցյանը`հստակեցնելով, որ դրանք ավարտական դասարանի մակարդակ են ապահովում: Հաճախ նաեւ 4-5-6-րդ դասարանների մակարդակի հարցեր են:
«Նրանք պարտավոր են հասարակության հետ առնչվել մաքուր, գրական հայերենով։ Սա հետաքրքիր ազդակ է, որ մաքուր պահենք մեր հայերենը։ Այս գործոններն ի շահ մայրենի լեզվի են»,- ասաց բանախոսը:
Կարդացեք նաև
Այլ մանրամասները`տեսանյութում
Ի դեպ, պատգամավորության թեկնածուները «կտրվելու» դեպքում մի քանի հնարավորություն կունենան թեստը վերահանձնելու:
Առաջիկայում, Սահմանադրության ամբողջական գործողության մեջ մտնելուց հետո, հայերենի քննություններ կսահմանվեն նաեւ դատավորների եւ ՀՀ նախագահի համար: Այս դեպքում, ըստ Սերգո Երիցյանի, հարցաշարը բարդ է լինելու:
Լրագրողներից մեկի հարցին`քննությունը նախատեսված է ոչ հայերեն կրթությամբ պատգամավորների համար, սակայն հայերենի կրթության վկայական ունեցող դոկտորներ ունենք, որոնք երկու բառ չեն կարողանում իրար կապել գրագետ հայերենով, Լեզվի տեսչության պետն ասաց, որ այդ հարցը շատ է քննարկվել. «Սահմանադրությունը խնդիր է դրել այս պահին հայերենի նվազագույն իմացություն ապահովել: Հետագայում հնարավոր կլինի նաեւ ձեր ասածին էլ անդրադառնալ»:
Նելլի ԳՐԻԳՈՐՅԱՆ