Սննդամթերքների մեջ իրենց ուրույն եւ կարեւոր տեղն ունեն ընկույզները: Նրանցից յուրաքանչյուր տեսակ առանձնանում է մի շարք օգտակար հատկություններով, վիտամիններով, հատկապես՝ E եւ B2-ի աղբյուր են: Հարուստ են նաեւ սպիտակուցներով, մանրաթելերով եւ հանքանյութերով, ինչպիսիք են՝ մագնեզիումը, ֆոսֆորը, կալցիումը, պղինձը եւ սելենը: Չնայած այս ամենին՝ մասնագետները որոշ ընկույզի տեսակների շատ օգտագործումը չեն խրախուսում:
Նշենք, որ ընկույզ են կոչվում որոշ բույսերի, առավելապես ծառերի կամ թփերի պտուղները կամ դրանց՝ ուտելու համար պիտանի միջուկը, որը պատված է կարծր կեղեւով։ Օրինակ, հնդկական ընկույզի կանոնավոր օգտագործումը կանխարգելում է աթերոսկլերոզի զարգացումը, թրոմբների առաջացումը, պաշտպանում է սիրտը, կարգավորում է աղիների միկրոֆլորայի գործունեությունը, ինչպես նաեւ խթանում է սեքսուալ ակտիվությունը: Հնդկական ընկույզն օգնում է պսորիազի, անեմիայի, դիստրոֆիայի, էնդոկրին համակարգի հիվանդությունների բուժման ժամանակ, թեթեւացնում է ատամնացավը:
Հնդկական ընկույզը հարուստ է բարձրորակ սպիտակուցներով եւ ճարպերով, դրանցում կան ածխաջրեր, օսլա, շաքար, ֆիտոստերոլներ, սննդաթելեր եւ ճարպաթթուներ, վիտամին E, PP, B խումբ, հանքային տարրեր` կալցիում, մագնեզիում, նատրիում, կալիում, ֆոսֆոր, երկաթ, ցինկ, պղինձ, սելեն, ամինաթթուներ` տրիպտոֆան, լիզին, մեթիոնին, գլիցին եւ այլն: Edaplus.info-ն նշում է, որ հնդկական ընկույզը 1-ին տեղն է զբաղեցնում մագնեզիումի քանակով, նաեւ պարունակում է ռեկորդային քանակության երկաթ եւ կալիում: Հնդկական ընկույզներն իսկապես ունեն հականեխիչ եւ հակաբակտերիալ հատկություններ, դրանք լավացնում են ախորժակը, աշխուժացնում եւ երիտասարդացնում են օրգանիզմը, վիտամին E-ի առկայության հաշվին ապահովում են ուռուցքաբանական հիվանդությունների կանխարգելումը: Այս բոլոր նյութերն ակտիվորեն աշխատում են առողջության բարելավման համար: Լավացնում են արյունատար անոթների վիճակը, խթանում ուղեղի, մարսողական համակարգի աշխատանքը եւ ամրապնդում իմունիտետը:
Չնայած այս ընկույզի օգտակարությանը, մասնագետները զգուշացնում են, որ այն հաճախ եւ մեծ քանակության չօգտագործել, վտանգավոր է երեխաների համար՝ առաջացնելով ալերգիկ ռեակցիաներ:
Պատրաստեց ԱՆՈՒՇ ՄԱԹԵՎՈՍՅԱՆԸ
«Առավոտ»
03,02.2017
