Փետրվարի 16-ին Կոնգրես հյուրանոցում «Mail.Ru Group»-ի հայաստանյան ներկայացուցիչ «Դիջի Սեյլզ» ընկերությունը և «Smartology Digital Marketing Academy»-ն համատեղ իրականացրին «Թվային օր. Մեյլ.ռու / Digital Day.Mail.Ru» խորագրով առաջին կոնֆերանսը Հայաստանում։
Կոնֆերանսի նպատակն էր բիզնեսի ներկայացուցիչներին և լայն հանրությանը ներկայացնել «Mail.Ru Group»-ի թվային տեխնոլոգիաների միջոցով բիզնեսի աջակցման գործիքները, հնարավորությունները և առավելությունները:
Հատուկ հյուրերն էին «myTarget» համակարգի հաճախորդների հետ աշխատանքների բաժնի ղեկավար Ալեքսանդր Կոնեվը, «Mail.Ru Group»-ի ներկայացուցիչներ Ալեքսանդր Սրեբկովը և Իգոր Վինեցկին:
«Դիջի Սեյլզ» ՍՊԸ տնօրեն Արսեն Սուլթանյանը (լուսանկարում) լրագրողների հետ զրուցելիս ասաց.«Օգտատերերի քանակով Odnoklassniki.ru կայքը շարունակում է առաջատար տեղ զբաղեցնել հայաստանյան շուկայում, սակայն Facebook-ի օգտատերերը գնալով աճում են: Թիրախավորված շուկայում Հայաստանի կտրվածքով ամենաակտիվն այս պահին Facebook–ն է, իսկ համատեքստային գովազդի առումով դոմինանտը դեռևս Google–ն է»:
Խոսելով «Mail.Ru Group»-ի մասին՝ Արսեն Սուլթանյանն ասաց, որ այն ներկայումս բավականին ուժեղ գործիքներ ունի ու սենգմենտավորման շատ լավ տվյալներ, որոնք Հայաստանի համար բավականին ճշգրիտ են աշխատում:
Մելանի ՍԱՐԳՍՅԱՆ
