Սյունիքի մարզի ընդհանուր իրավասության դատարանի դատավոր Ի. Բեգլարյանի նախագահությամբ ընթացած Տիգրան Կարապետյանի՝ վիրավորանք հասցնելու համար լրատվության միջոցով հրապարակային ներողություն խնդրելու, զրպարտություն համարվող փաստացի տվյալները լրատվության միջոցով հերքելու եւ փոխհատուցում վճարելու մասին հայցադիմումի քննությունը տեւեց 5 րոպե: Գորիսի քաղաքապետի նախկին թեկնածու Տիգրան Կարապետյանի հայցը պատասխանող ճանաչված, Սյունիքի մարզպետի նախկին խորհրդական, Արցախյան պատերազմի պահեստազորի գնդապետ Վոլոդյա Հովհաննիսյանի եւ երրորդ անձ ճանաչված «Առավոտ» օրաթերթի դեմ էր: Նրանք վիճարկում էին երկու տարի առաջ մայիսի 12-ին Aravot.am կայքում հրապարակված «Սուրիկ Խաչատրյանին սպառնում են» հրապարակման մեջ տեղ գտած տեղեկություններն ու արտահայտությունները:
«Առավոտ» օրաթերթը ստացել էր ծանուցագիր եւ երեկվա նիստին պետք է մասնակցեր նաեւ, որպես վկա, հրապարակման հեղինակ Տաթեւ Հարությունյանը: «Առավոտի» ներկայացուցիչն էր լրագրող Ռուզան Մինասյանը: Դատական կարճատեւ նիստի ժամանակ հայցվորը հրաժարվեց հայցից, իսկ Վոլոդյա Հովհաննիսյանն էլ հայտնել էր, որ ամենեւին նպատակ չի ունեցել վիրավորել Տիգրան Կարապետյանին: Դատական նիստին ըստ էության անհրաժեշտ չեղավ այլեւս լսել վկային: Նշենք, որ Սյունիքի մարզի ընդհանուր իրավասության դատարանը հայցադիմումը ընդունել էր վարույթ 2015թ. հունիսի 19-ին, իսկ նախնական անդրանիկ դատական նիստը նշանակվել էր 2016թ. հուլիսի 15-ին: 2015թ. դեկտեմբերի 16-ին դատարանի որոշմամբ քաղաքացիական գործը նշանակվել էր դատաքննության:
Հիշեցնենք, որ անցյալ տարվա ապրիլյան դեպքերի ժամանակ դատարանը քաղաքացիական գործի վարույթը կասեցրել էր, քանի որ պատասխանող Վոլոդյա Հովհաննիսյանը գտնվում էր զինված ուժերի կազմում:
ՌՈՒԶԱՆ ՄԻՆԱՍՅԱՆ
Սիսիան-Երեւան
«Առավոտ»
23.05.2017
