Մեկ շնչին ընկնող ՀՆԱ ցուցանիշը 2015 թվականի մոտ 3500 ԱՄՆ դոլարից նախատեսվում է 2040 թվականին հասցնել մոտ 15000 ԱՄՆ դոլարի: Առաջիկա 5 տարիների ընթացքում ապրանքների եւ ծառայությունների արտահանումը պետք է կազմի մինչեւ ՀՆԱ 40-45 տոկոսը, 2040 թվականին պետք է հասնի մինչև ՀՆԱ 50-55 տոկոսը: Աղքատության ցուցանիշը առաջիկա 5 տարում առավելագույնը պետք է կազմի 18 տոկոս, իսկ 2040 թվականին՝ 7-8 տոկոս: Ժողովրդագրական իրավիճակի էական եւ կտրուկ բարելավման արդյունքում 2040 թվականին դառնալու ենք 4 մլն:
Ազգային ժողովում նախագահ Սերժ Սարգսյանն ահա այսպիսի խոստումներ տվեց:
Aravot.am-ի հարցին՝ դուք հավատո՞ւմ եք, որ 2040-ին այդպիսի պետություն ենք ունենալու, հավատո՞ւմ եք այն ամենին, ինչ ասաց Սերժ Սարգսյանն ԱԺ-ում՝ «Ելք» դաշկինքի պատգամավոր, նախկին վարչապետ Արամ Սարգսյանը պատասխանեց. «Սերժ Սարգսյանը պիտի մտածի, որ 2018-ին ինքը հեռանում է, 2040 թվականի մասին խոսելը, կարծում եմ, պատեհ չի իր պարագայում»:
Արամ Սարգսյանի համար տարօրինակ է՝ Սերժ Սարգսյանն ասել է, որ որեւէ պաշտոն չի զբաղեցնելու պաշտոնավարման ժամկետի ավարտից հետո, ուստի ինչո՞ւ է պլաններ կազմում հեռավոր 2040-ի համար:
Հռիփսիմե ՋԵԲԵՋՅԱՆ
