ԱԺ-ում այսօր «Արցախահայերի սոցիալ-տնտեսական, իրավական խնդիրները և լուծումները» թեմայով քննարկումը դրա մեկնարկից մոտ կես ժամ հետո բոյկոտեցին ՔՊ-ական պատգամավորները։
Քննարկումից դուրս գալուց հետո Աշխատանքի և բարեկեցության հանձնաժողովի փոխնախագահ, ՔՊ խմբակցության պատգամավոր Մարիամ Պողոսյանը լրագրողների հետ զրույցում իրենց բոյկոտը այսպես պատճառաբանեց. «Մեզ ասել էին, որ քննարկումը կլինի Ղարաբաղի մեր հայրենակիցների սոցիալական խնդիրներին վերաբերող, տեսանք, որ սա վերածվել էր կարծես թե միջխորհրդարանական հանդիպման, ինչ-որ պաշտոններ էին հնչում։ Բազմիցս ենք ասել, որ ՀՀ-ում չի կարող լինել երկու խորհրդարան, երկու կառավարություն։ Դրա համար ստիպված լքեցինք դահլիճը»։
Կարդացեք նաև
ՔՊ-ական պատգամավորը նկատի ուներ Արցախի խորհրդարանի ու կառավարության պաշտոնյաներին, որոնք ներկա էին քննարկմանը:
«Կառավարությունն ու Ազգային ժողովը միշտ սերտորեն կապի մեջ են Ղարաբաղի մեր հայրենակիցների հետ, մենք ծանոթ ենք նրանց խնդիրներին։ Գարնանը եղել է մեծ համաժողով՝ վարչապետի գլխավորությամբ, ու խնդիրներին տրվել են լուծումներ։ Մի քանի օր առաջ ևս հանդիպել էինք Ղարաբաղի մեր հայրենակիցների հետ, այդ կապը կա»,- ասաց ՔՊ-ական պատգամավորը և հեռացավ՝ անպատասխան թողնելով լրագրողների հարցերը։
Միջազգային իրավունքի մասնագետ Արա Ղազարյանը նշեց՝ այս միջադեպն իրեն հիշեցրեց միջազգային կառույցներում ադրբեջանցիների վարքը. «16 տարի է Ադրբեջանի դեմ վարույթներում եմ, հենց առաջին գործերից Ադրբեջանը պահանջում էր Եվրոպական դատարանից չօգտագործել Արցախի հայկական անվանումները, պետական, հանրային մարմինների փաստաթղթերը։ Հենց առաջին օրվանից Եվրոպական դատարանը մերժել է, որովհետև գործում էր հանրային իրավունքը, Եվրոպական դատարանը նույնիսկ Արցախի դատարանների որոշումներն է ճանաչել լեգիտիմ ակտեր և դրա հիման վրա որոշումներ կայացրել»։
Արփինե ՍԻՄՈՆՅԱՆ
