ԱՄՆ-ը ֆինանսական պատժամիջոցներ է սահմանել ռուսական «Վագներ» մասնավոր ռազմական ընկերության վրա: Պատժամիջոցային նոր ցուցակն ԱՄՆ ֆինանսների նախարարության կայքում տեղադրվել է հունիսի 20-ին:
Ընդ որում, ցուցակում չի նշվում՝ որտեղ է տեղակայված «Վագներ» ընկերությունը: Վերջինիս հետ կապված անձանց մասին նույնպես ոչինչ չի հաղորդվում, բայց նշվում է, որ պատժամիջոցները սահմանվել են ընկերության ենթադրյալ ղեկավար Դմիտրի Ուտկինի նկատմամբ:
Ֆինանսների նախարարության հաղորդագրության մեջ նշվում է, որ «Վագները» մասնակցել է Ուկրաինայի արևելքում ռազմական հակամարտությանը:
Պատժամիջոցների տակ են հայտնվել նաև Եվգենի Պրիգոժինի «Կոնկորդ» ռեստորանային ընկերությունը, որին անվանում են «Պուտինի խոհարար»: Ինքը՝ Պրիգոժինը, պատժամիջոցների տակ էր հայտնվել դեռ 2016թ. դեկտեմբերին:
Անհատական պատժամիջոցներ են սահմանվել նաև Ռուսաստանի Տնտեսական զարգացման փոխնախարար Սերգեյ Նազարովի նկատմամբ, որը, ինչպես պնդում են, ֆինանսական և նյութական աջակցություն է ցուցաբերում Դոնեցկին և Լուգանսկին: Արգելքի տակ են հայտնվել նաև Դոնեցկի Կենտրոնական հանրապետական բանկը և «Միջազգային հաշվարկների կենտրոնը»:
Ուկրաինայի հակամարտության հետ կապված ԱՄՆ-ի պատժամիջոցների ցուցակում ընդհանուր առմամբ ներառված է 407 ընկերություն և 160 անձ:
Պատրաստեց՝ Վիկտորյա ԱՆԴՐԵԱՍՅԱՆԸ
