Այսօր կառավարությունը հավանություն տվեց «Տիեզերագնացներին փրկելու, տիեզերագնացների վերադարձի եւ տիեզերական տարածություն արձակված օբյեկտների վերադարձի մասին» միջազգային համաձայնագրին, որը Հայաստանը եւս վավերացրեց: Այս համաձայնագիրը դեռեւս 1968 թվականին Լոնդոնում, Մոսկվայում եւ Վաշինգտոնում ստորագրվել է մի շարք երկրների միջեւ:
Այսօր կառավարության նիստից հետո Aravot.am-ը տրանսպորտի, կապի եւ տեղեկատվական տեխնոլոգիաների նախարար Վահան Մարտիրոսյանից հետաքրքրվեց, թե ի՞նչ է իրենից ներկայացնում այդ համաձայնագիրը եւ մեր երկիրն ի՞նչ պարտավորություններ է ստանձնում:
Մարտիրոսյանն ասաց, որ այս միջազգային համաձայնագրին Հայաստանը պարտադիր պետք է մասնակից լինի. «Միջազգային համաձայնագիրն այնպիսին է, որ այնպես չէ, որ երկիրը անպայման մասնակցում է դրան, թե՝ ոչ»:
Թե ինչ պարտավորություններն ենք ստանձնել այդ համաձայնագրով, նախարարն ասաց՝ «Օրինակ՝ տիեզերքը խաղաղ օգտագործելու, լուսինը»:
Հարցին՝ հնարավո՞ր է մի օր տիեզերքն ու լուսինն էլ զավթե՞նք, այս մի փոքր հումորային հարցին, նախարարն էլ հումորով պատասխանեց. «Կարող է մի օր գա, հնարավորությունն էլ, այո, զավթենք լուսինն էլ, չէ, զավթել չէ, խաղաղ օգտագործենք»:
Այն հարցին էլ՝ մի ժամանակ արբանյակ ունենալու ծրագիր կար, հիմա ի՞նչ փուլում է, պարոն Մարտիրոսյանը, որն, ի դեպ, հազիվ էր ծիծաղը զսպում, պատասխանեց. «Հիմա էլ կա, հիմա բացե՞մ բոլոր… մեր համագործակցության եզրերը շարունակում ենք ե՛ւ Ռոսկոսմոսի հետ, ե՛ւ չինական ընկերությունների, ե՛ւ եվրոպական ընկերությունների հետ՝ տեսնենք համատեղ արբանյակ ունենալու… դա բանակցություններ ունենալու… դա մեծ ծրագիր է, որը պահանջում է մեծ ֆինանսավորում: Մենք կունենանք մեր արբանյակը, որով մենք հնարավորություն կունենանք ծառայություններ մատուցել ե՛ւ կապի ոլորտում, ե՛ւ մեր պաշտպանական խնդիրները լուծենք»:
Կրկին հումորային հարցին՝ հիմա հնարավորություն չկա՞ լուսին գնալու, նախարարն էլ կրկին հումորով պատասխանեց. «Հիմա՞, հիմա շատ շոգ է»:
Մանրամասն՝ տեսանյութում
Նելլի ԲԱԲԱՅԱՆ
