Իրանի խորհրդարանն օրերս հաստատեց ՀՀ-ի եւ Իրանի միջև «Մեղրի-Նորդուզ սահմանային դարպասի համատեղ օգտագործման մասին» համաձայնագիրը: Այդ անցակետն Իրանի համար կարևոր է երկկողմ առևտրաշրջանառությունն ապահովելու եւ տարանցիկ բեռնափոխադրումներ իրականացնելու տեսանկյունից: Թեմայի շուրջ այսօր «Հենարան» մամուլի ակումբում լրագրողների հետ հանդիպմանը իրանագետ Արմեն Իսրայելյանն ասաց՝ նշյալ դարպասի համատեղ օգտագործման մասին համաձայնագրի հիմնական նպատակն է՝ Իրանի եւ ՀՀ-ի միջեւ տնտեսական ոլորտում ձեռք բերված հեռանկարային ծրագրերը կյանքի կոչելը. «Խոսքը երկկողմ առեւտրաշրջանառության ծավալների մեծացման, տնտեսական ծրագրերի իրականացման, տարանցիկ բեռնափոխադրումների, գազի տարանցման մասին է: Սա նաեւ միջոց է՝ ՀՀ-ում եւ Իրանում միջազգային ներդրողներ ներգրավելու համար»:
Փորձագետի բնորոշմամբ՝ որպեսզի սահմանային անցակետում մաքսային գործընթացներն արագ ձեւակերպվեն եւ բեռնափոխադրողները արագ սպասարկվեն, համատեղ աշխատանքային խումբ է ձեւավորվելու. «Բացի այդ, մաքսանենգության վերաբերյալ տեղեկատվության արագ փոխանակում է լինելու, որպեսզի սահմանին ի հայտ եկած խնդիրները արագ լուծում ստանան»:
Արմեն Իսրայելյանի փոխանցմամբ՝ 2015թ. ՀՀ-Իրան առեւտրաշրջանառության ծավալը՝ ոչ նավթային ապրանքներ, կազմել է 130 միլիոն դոլար, իսկ 2016թ.-ին զգալի աճ է նկատվել՝ 170 միլիոն դոլար. «Այս համաձայնագրի փորձագիտական եզրակացության մեջ կարեւորվում է այդ հանգամանքը: Հիմնավորվում է, որ ՀՀ-ն կարեւոր դեր ունի Իրանի համար եւ անհրաժեշտ է մեծացնել առեւտրաշրջանառության ծավալները»:
Իսրայելյանը համոզմունք հայտնեց, որ Իրանի հետ տնտեսական գործակցությունը խորացնելու համար ՀՀ-ն պետք է կարճաժամկետ եւ երկարաժամկետ ծրագրեր իրականացնի, նախապայմաններ ստեղծի ներդրումների համար:
Մանրամասն՝ տեսանյութում
Լուիզա ՍՈՒՔԻԱՍՅԱՆ
