«Թեեւ ի սկզբանե մտահոգություններ կային, որ ՀՀ-ի անդամակցումը ԵԱՏՄ-ին կվնասի հայ-իրանական հարաբերություններին, բայց վերջին տարիներին պաշտոնական Թեհրանի դիրքորոշումն այլ է՝ Իրանը ողջունում է ՀՀ-ԵԱՏՄ գործակցությունը եւ շահագրգռված է, որ ՀՀ-ի միջոցով կապ հաստատի ԵԱՏՄ երկրների հետ»,-«Հենարան» մամուլի ակումբում այսօր անդրադառնալով ՀՀ բարեկամ Իրանի տարածաշրջանային տնտեսական քաղաքականությանը, ասաց իրանագետ Արմեն Իսրայելյանը:
Նա նկատեց, որ ՀՀ-ն էլ իր հերթին է շահագրգիռ կողմ եւ Իրանին առաջարկել է համատեղ ձեռնարկություններ հիմնել, իր տարածքով բեռնափոխադրումներ իրականացնել. «Ներկայում նաեւ ՀՀ-ի միջոցով է Իրանը ակտիվ գործակցում ԵԱՏՄ-ի հետ: Հիմա փորձում են համաձայնության գալ այն ապրանքատեսակների վերաբերյալ, որոնք ԵԱՏՄ-ն կտրամադրի ավելի ցածր մաքսատուրքերով»:
Փորձագետը նշեց, որ եթե նախկինում Իրան-Թուրքիա խորը տնտեսական գործակցություն կար, ապա վերջին տարիներին առեւտրաշրջանառության ծավալները որոշակի խնդիրների պատճառով նվազել են: Այդ պատճառով էլ Իրանը նախորդ տարի կոչ արեց բեռնափոխադրումներ իրականացնելիս ընտրել ՀՀ-ի տարածքը:
Մանրամասն՝ տեսանյութում:
Լուիզա ՍՈՒՔԻԱՍՅԱՆ
