Վերջերս տեղի ունեցավ Թուրքիա-Ադրբեջան-Վրաստան ձեւաչափով արտգործնախարարների հանդիպումը, որի հայտարարությամբ կողմերը հանդես են գալիս Ադրբեջանի եւ Վրաստանի տարածքային ամբողջականության օգտին, իսկ Վրաստանում կազմակերպված ՆԱՏՕ-ի Agile Spirit 2017 զորավարժություններին ՀՀ-ն չի չմասնակցեց: Այս ամենը, ըստ արեւելագետ, թուրքագետ Ռուբեն Սաֆրաստյանի, հիմք չի տալիս ենթադրելու, որ ՀՀ-ն կորցնում է հարեւան Վրաստանին: «Պարզապես Թուրքիայի նախաձեռնությամբ փորձ է արվում Հարավային Կովկասում ստեղծել առանցք, որը բացի տնտեսական եւ հումանիտար խնդիրներից, խնդիր է դնելու նաեւ ռազմական գործակցության: Այս գործընթացը կշարունակվի, իսկ մեր դիվանագիտությունը պետք է փորձի դրան հակադրել ՀՀ-Իրան-Ռուսաստան առանցքի ստեղծումն ու խորացումը: Հակադրվելու այլ ճանապարհ չեմ տեսնում»,-«Հայելի» մամուլի ակումբում այսօր լրագրողների հետ հանդիպմանն ասաց Սաֆրաստյանը:
Նա կարծում է, որ Թուրքիայի կողմից նշյալ ձեւաչափի ամրապնդումը Հայաստանին մեկուսացնելու նպատակ ունի: Անդրադառնալով Թուրքիայի կողմից ՌԴ-ից S-400 հակաօդային պաշտպանության համակարգերի գնման գործընթացին՝ նա համոզմունք հայտնեց, որ դրանք Թուրքիայի կողմից չեն տրվի Ադրբեջանին. «Համոզված չեմ, որ գործարքն ավարտին կհասցվի, որովհետեւ ԱՄՆ-ից ճնշումը Թուրքիայի վրա մեծ է»:
Փորձագետը խոսեց նաեւ Ալիեւի եւ նրա մերձավորների շուրջ նոր սկանդալի մասին: Հիշեցնենք՝ ըստ միջազգային հետաքննող լրագրողների՝ Ադրբեջանի նախագահի ընտանիքն ու դրան մոտ կանգնած գործարարները երկու տարում եվրոպական բանկերից մեկի և Մեծ Բրիտանիայում գրանցված չորս ընկերությունների միջոցով շուրջ 3 միլիարդ դոլար են օրինականացրել: «Հույս ունենանք, որ այդ ապօրինի գործունեությանը համարժեք պատասխան կտրվի»,-նշեց Ռուբեն Սաֆրաստյանը:
Լուիզա ՍՈՒՔԻԱՍՅԱՆ
