«էսօրվա թեման՝ կապիտալիզմը, ծնվեց մեր առօրյայից: Եթե կարող եք նշել մի բնագավառ, որտեղ էդ դեր չի խաղում, կանցնենք իմ թվարկած բնագավառներին, որտեղ դեր է խաղում»,-այսպես է մեկնաբանում իր՝ «Հարյուր դոլարանոց թղթադրամ» կտավը` երիտասարդ արվեստագետ Գոռ Գյուրջյանը: Երևանի Ժամանակակից արվեստի թանգարանում սեպտեմբերի 9-ին այն ցուցադրվեց առաջին անգամ: «97%» վերնագրված սոլո-նախագիծը նպատակ ուներ ներկայացնել ոչ թե բողոքն ընդդեմ կապիտալիզմի, այլ արդի աշխարհում ստեղծված համընդհանուր վիճակը: Գեղարվեստի պետական ակադեմիայի նախկին ուսանող Գոռը կտավի վրա աշխատել է 1 տարի 4 ամիս: Յուղաներկով է նկարել, մի փոքր էլ անկեղծանում է. «Փոքր վրձինով եմ աշխատել»: Նպատակ ունի ապագայում կտավը ներկայացնել նաև Նյու Յորքում:
Անկեղծությունն էլ կյանքում ամենաշատը կարևորում է արվեստի մեջ. «Որպես էդպիսին որևէ ուղղություն չեմ նախընտրում արվեստի մեջ: Դա շատ անկեղծ պետք է լինի: Այսինքն` ենթակա է փոփոխության: Իմ հիմնական թեման մարդն է իր առօրյայով ու զգացմունքներով: Փորձում եմ արվեստում ինքս ինձ հնարավորինս անկեղծ դրսևորել»:
Ի դեպ, Գոռն իր այս կտավը նկարելիս մի քանի կիլոգրամ նիհարել է: Այն հարցին, թե կարող է այլ դրամական արժույթ դառնալ հաջորդ կտավի թեման, ժպտում է ու պատասխանում. «Սա ինձնից չափազանց շատ էներգիա է խլել, որպեսզի երկրորդ անգամ փորձեմ»:
Ուշագրավ է ցուցահանդեսի խորագիրը՝ «97%»: Խնդրեցինք Գոռին մեկնաբանել մտահղացումը. «Ընդունենք կտավը որպես արվեստի դաշտ: Թղթադրամը 97% տեղ է զբաղեցնում կտավի մեջ: Մեր առօրյայում էլ դրանից պակաս տեղ հաստատ չի զբաղեցնում: Իհարկե, այս ամենը սիմվոլիկ է»:
Նելլի ՊԵՏՐՈՍՅԱՆ
