Էրեբունի եւ Նուբարաշեն վարչական շրջանների ընդհանուր իրավասության դատարանում այսօր հուլիսի 29-ին զանգվածային անկարգություններ կազմակերպելու եւ ոստիկանության ՊՊԾ գունդը գրաված ու ծանր հանցագործությունների մեջ մեղադրվող «Սասնա ծռեր» զինված խմբին օժանդակելու մեջ մեղադրվող Անդրիաս Ղուկասյանի գործով հերթական դատական նիստն է:
Մեկնարկից առաջ ամբաստանյալ Անդրիաս Ղուկասյանը լրագրողների հարցերին ի պատասխան կարծիք հայտնեց իրեն առաջադրված մեղադրանքի մասին առ այն, որ մտադրվել է միանալու «Սասնա ծռերին»:
«Սուտ վկայություն կա այն մասին, որ ես իբր թե հուլիսի 29-ին ունեցել եմ նման մտադրություն: Դա ակնհայտ սուտ ցուցմունք է, ես նման շարժառիթ անգամ չէի կարող ունենալ»,-վստահեցրեց նա: Հիշեցնենք, որ Ղուկասյանն իրեն առաջադրված մեղադրանքը չի ընդունում:
«Սա քաղաքական գործ է»,-դատավարության մասին էլ նման գնահատական հնչեցրեց նա:
Նիստը սկսվելուն պես հետաձգվեց, քանի որ Ղուկասյանի պաշտպանները ներկա չէին: Հաջորդ նիստը կկայանա սեպտեմբերի 26-ին, 12:00-ին:
Անդրիաս Ղուկասյանին առաջադրված մեղադրանքի մասին մանրամասն՝ քիչ ուշ:
Լուիզա ՍՈՒՔԻԱՍՅԱՆ
