ՀՀԿ մամուլի քարտուղար Էդուարդ Շարմազանովը ԵԱՏՄ-ին անդամակցությունը սառեցնելու «Ելք» խմբակցության առաջարկը արհեստական օրակարգ է համարում:
«Հայաստանում բազմակուսակցական համակարգը եւ բազմակարծությունը պաշտպանված է օրենքով, եւ պետք չէ զարմանալ, որ շատ քաղաքական ուժերի տեսակետները չեն համընկնում իշխող ուժի տեսակետների հետ»,- այսօր ՀՀԿ ԳՄ նիստից հետո լրագրողներին ասաց Շարմազանովը:
«Եղան լսումներ, «Ելք»-ի գործընկերները ներկայացրին իրենց կարծիքը, մենք՝ մերը, բայց մի բան հստակ է։ Հայաստանը պետք է շարունակի անդամակցությունը ԵԱՏՄ-ին, որովհետեւ դա բխում է մեր շահերից»,- հավելեց նա:
Նրա խոսքով, աբսուրդ կլիներ, եթե մի պետություն 3 միլիոնանոց շուկայում առեւտուր անելու փոխարեն հնարավորություն ունենար առեւտուր անել 150 միլիոնանոց շուկայում, ու չաներ. «Արդյոք մենք կարողացել ենք օգտագործել բոլոր հնարավորությունները, դա այլ հարց է։ Բայց ԵԱՏՄ-ն լքելը չի բխում մեր շահերից»:
Արփինե ՍԻՄՈՆՅԱՆ
