Ինչպես տեղեկացրել ենք, Ժիրայր Սեֆիլյանի եւ մյուսների գործով դատական նիստն է եւ հարցաքննվում էր Պավլիկ Մանուկյանը:
Մանուկյանից հետո պետք է հարցաքննվեր Վարուժան Ավետիսյանը: Վերջինս հրաժարվեց մոտենալ ամբիոնին եւ այդպես հարցաքննվել: Պաշտպան Մուշեղ Շուշանյանն ասաց, որ դա իր դիրքորոշումն է ու այդ դիրքորոշման պատճառով չի կարող սահմանափակել Ժիրայր Սեֆիլյանի եւ Գեւորգ Սաֆարյանի իրավունքները՝ դատավարական ընթացակարգերի պատճառով:
Դատավորն էլ ասաց, որ եթե Վարուժան Ավետիսյանը չի ցանկանում մոտենալ ամբիոնին, կարող է կանգնած ցուցմունք տալ: Վարուժան Ավետիսյանը չկանգնեց: Նա միայն տեղից սկսեց զինված ապստամբության կոչեր անել ժողովրդին. «Հայաստանում դատարան չկա, դա ռեժիմի գործիք է եւ ես այստեղ եմ՝ պաշտպանների միջնորդությամբ: Պատրաստ եմ պատասխանելու պաշտպանական կողմի հարցերին, սակայն կպատասխանեմ նստած տեղից»:
Դատավորն ասաց, որ Վարուժան Ավետիսյանը ամբաստանյալի կարգավիճակում է, պարտավոր է կանգնել, եթե ոչ, կհեռացվի դատական նիստից:
Ավետիսյանն էլ արձագանքեց. «Ես պարտավոր եմ լինել ՀՀ քաղաքացի, որպես ՀՀ քաղաքացի՝ ես ապստամբել եմ, զինված ապստամբություն եմ իրականացրել ազգադավ եւ ոճրագործ ռեժիմի դեմ եւ առիթից օգտվելով՝ կոչ եմ անում ժողովրդին նորից դիմել զինված ապստամբության եւ ազատագրվել գաղութային այս կախյալությունից»:
Վարուժան Ավետիսյանին դատավորը թույլ չտվեց հարցաքննությանը մասնակցել ու հեռացրեց նրան դատական նիստից:
Դատական նիստն ընդմիջվեց, քանի որ պաշտպանական կողմը միջնորդություն ներկայացրեց նոր վկաներ ներգրավելու համար:
Հռիփսիմե ՋԵԲԵՋՅԱՆ
