Այսօր «Պոստ Սկրիպտում» ակումբում ապրիլյան պատերազմի հերոս Հարություն Բադալյանը ուշագրավ պատասխան տվեց, երբ լրագրողներից մեկը հարցը ձեւակերպելիս ասաց՝ դուք մյուսներին հորդորում եք պաշտպանել հայրենիքը, բայց ձեր ծառայակիցներից կան, որ այնպիսի բաներ են պատմում բանակից…
Հարություն Բադալյանն արձագանքեց.
«Իսկ դուք ի՞նչ եք արել, որ զինվորը դուխով իրեն զգա, կոնկրետ դուք ինչ-որ մի բան արե՞լ եք, ձեզ այդ հարցը չի՞ տանջել: Ախր մենք սովորություն ունենք ամեն մեկս մյուսի վրա գցելու՝ պետք է անեին, պետք է անեին, բա ո՞վ պետք է անի: Եթե մենք ինքներս մեր չափով չանենք, ո՞վ է դա անելու:
Եթե մենք զինվորի կողքին չեղանք, շատ բան չեմ ասում՝ էնքան որ ֆեյսբուքում գրառում կատարեք, թող մի զինվոր մտնի, նայի, կամ քաղաքացին մտնի նայի, զինվորին ասի՝ տես, քո մասին բան են գրել: Դա դուխը չի՞ բարձրացնում զինվորի: Կամ որ զինվորի կենացն են խմում, զինվորի դուխը չի՞ բարձրանում: Կամ ինչ-որ մի նամակ են ուղարկում զինվորին, զինվորը կարող է այդ պահին չհասկանա նամակի իմաստը, բայց հենց ժամանակը գա, ես ձեզ վստահեցնում եմ՝ ինքը այդ նամակը հիշելու է»:
Մենք հետաքրքրվեցինք՝ Դուք կարծում եք, բավարար ուշադրություն հասարակության կողմից չկա՞, զինվորը չի՞ զգում ժողովրդի սերը իր թիկունքում՝ Հարություն Բադալյանը պատասխանեց. «Բավարար է, չեմ ասում բավարար չի, բայց ինչքան շատ լինի դա, այնքան լավ»:
Հռիփսիմե ՋԵԲԵՋՅԱՆ
