«Ներողություն, եթե որևէ մեկին անհարկի շփոթել եմ սադրիչի հետ». Նիկոլ Փաշինյանի գլխավորած երթն ավարտվեց

Քիչ առաջ ցուցարարները վերադարձան Հանրապետության հրապարակ, ծածանեցին ՀՀ դրոշը, հնչեց այս օրերին ծնված «Իմ քայլը, քաղաքացու երգ» հիթը:

Այնուհետև Նիկոլ Փաշինյանը հանդես եկավ եզրափակիչ խոսքով. «Այն իրավիճակը, որ կանխատեսել էինք Սերժ Սարգսյանի համար, իրականություն է: Մենք գնացինք ու տեսանք, որ Սերժ Սարգսյանն ապրում է զրահապատ մեքենաների, մի քանի շարք ոստիկանների, սաղավարտների և վահանների ետևում: Եվ այլ կյանք Սերժ Սարգսյանը Հայաստանում չի ունենալու: Մենք սրանում համոզվեցինք»:

Նիկոլ Փաշինյանը ցուցարարներին շնորհակալություն հայտնեց այս լարված երթը բարձր մակարդակով անցկացնելու համար: Այնուհետև ներողություն խնդրեց, եթե որևէ մեկին անհարկի շփոթել է սադրիչի հետ: Ավարտելով պարոն Փաշինյանն ասաց. «Բոլոր նրանք, ովքեր պատրաստ են գիշերել հրապարկում, առավել ևս, պատրաստ են առավոտյան ժամը 8-ին լինել այստեղ»:

Տաթև ՀԱՐՈՒԹՅՈՒՆՅԱՆ