Ինչպես արդեն տեղեկացրել ենք, Սերժ Թանկյանը ժամեր առաջ ժամանել է Հայաստան: «Զվարթնոց» օդանավակայանից նրա Նիկոլ Փաշինյանը և շարժման մյուս անդամները ուղեկցեցին Հանրապետության հրապարակ, որտեղ նա ելույթ ունեցավ:
Նա նախ ներողություն խնդրեց, որ ուշացել է «այս գեղեցիկ հեղափոխությունից»՝ նշելով, որ վերջին 2-3 շաբաթը հոգեպես Երևանում էր. «Ուզում եմ շնորհակալություն հայտնել ձեզ՝ իմ սիրելի ժողովուրդ, որ կարողացաք ձեր խաղաղ ցույցերով ստեղծել հայազգի պարծանքին արժանի հայրենիք: Հիմա արդեն ամբողջ աշխարհը ձեզ է նայում իբրև դրական օրինակ: Երգով, պարով ու ժպիտով հասաք ձեր նպատակին»:
Սերժ Թանկյանի խոսքերով՝ աշխարհը տարիներ շարունակ հայ ազգին ճանաչել է Ցեղասպանությունով, երկրաշարժով և պատերազմով, բայց այս շարժումով բարձրացավ ամբողջ հայ ժողովրդի վարկանիշը. «Այս հեղափոխության միտքը եղավ ընդդիմադրությունը, իսկ սիրտը՝ սերը: Սիրո այս ուժն է, որ հաղթահարեց այլ բացասական բոլոր ուժերին: Բայց դուք նախ հաղթահարեցիք ձեր վախը և ձեր անտարբերությունը՝ գտնելով ձեր միասնությունը, ձեր միասնության մեջ՝ ուժ: Ես ձեզ նման տարիներով երազում էի այս օրվա մասին և լիովին հպարտանում եմ ձեր կողքին կանգնելով»:
Նա հավելեց. «Տարիներով ասում էին՝ Սե՛րժ, արի՛ Հայաստան և հարյուր հազար ժողովուրդ կհետևի քեզ: Իմ պատասխանը միշտ նույնն էր՝ երբ հայ ժողովուրդը պատրաստ լինի կանգնել ո՛չ Սերժ Թանկյանի, ո՛չ այլ անձի կարիքը կունենա, քանի որ պատրաստակամ պետք է լինի պայքարելու անձնական և ազգական բոլոր իրավունքների ճակատին: Խոնարհվելով ձեր առջև՝ ես եկել եմ ձեզ հետևելու և ձեզ աջակցելու՝ կերտելու համար երազանքի մի հայրենիք»:
Իր խոսքը ամփոփելով՝ նա շնորհակալություն հայտնեց շարժման առաջնորդ Նիկոլ Փաշինյանին և երիտասարդ կազմակերպիչներին. «Որ կարողացան ձեր հուսահատությունը և զայրույթը վերածել դրական, խաղաղ և արդյունավետ պայքարի: Բրավո՛: Հիմա պետք է սկսի համբերության ժամանակը, այսինքն՝ գործը նոր է սկսելու, պետք է շարունակենք մեր պայքարը այս գործով, բարեփոխումներով և ներդրումներով, քանի որ արդարության ճամփան մի քանի հաղթանակով չի կերտվում, սիրելի՛ ժողովուրդ»:
Իր ելույթը Թանկյանը ավարտեց երգելով հատված «Բարի արագիլ» երգից:
Տեսանյութերը՝ «Ազատություն» ռադիոկայանի:
Ամի ՉԻՉԱԿՅԱՆ
