2016թ. ՀՀ ոստիկանության ՊՊԾ գունդը գրաված եւ մի շարք ծանր հանցագործությունների կատարման համար մեղադրվող «Սասնա ծռեր» խմբի անդամներից մի մասի գործով հերթական դատական նիստում այսօր մեղադրյալներից Գագիկ Եղիազարյանի (լուսանկարում) շահերի պաշտպան, փաստաբան Տիգրան Եգորյանը դատարանին ներկայացրեց նրա խափանման միջոց կալանքը փոխելու, ասել է թե՝ ազատ արձակելու միջնորդություն: Վերջինիս հիմքում պատգամավորական երաշխավորագրերն էին:
Դատարան ներկայացան ԱԺ «Ծառուկյան» խմբակցության պատգամավորներ Վահե Էնֆիաջյանը, Շաքե Իսայանն ու Հակոբ Նազարյանը եւ հաստատեցին՝ ստանձնում են պատասխանատվություն առ այն, որ ազատության մեջ գտնվելով՝ Գագիկ Եղիազարյանը կդրսեւորի պատշաճ վարքագիծ ու կներկայանա դատական նիստերին:
Մեղադրող-դատախազ Արամ Արամյանը միջնորդության դեմ չառարկեց: Դատարանը հեռացավ խորհրդակցական սենյակ՝ որոշում կայացնելու, որը կհրապարակվի այսօր:
Նկատենք, որ վերջերս Եղիազարյանին կալանքից ազատելու միջնորդություն էր ներկայացվել առանց պատգամավորական երաշխավորագրերի եւ մերժվել:
«Ծառուկյան», ինչպես նաեւ «Ելք» խմբակցությունների պատգամավորների երաշխավորագրերի հիման վրա զինված խմբի անդամների մի մասն ազատված է կալանքից:
Գագիկ Եղիազարյանը, ինչպես եւ խմբի անդամների մեծ մասը, մեղադրվում է ապօրինի զենք-զինամթերք պահելու-կրելու, ռազմավարական նշանակության շենք-շինություններ զավթելու եւ պատանդառություն կատարելու համար: Մինչեւ ՊՊԾ գնդի գրավումը նա աչքի է ընկել քաղաքացիական ակտիվությամբ՝ մասնակցելով մի շարք բողոքի ցույցերի ու նախաձեռնությունների:
Լուիզա ՍՈՒՔԻԱՍՅԱՆ
