Այսօր՝ օգոստոսի 16-ին տեսանք, որ Իջեւանի տարածաշրջանի Աճարկուտ գյուղի խաչմերուկի մոտ ճանապարհաշինարարները փռում են ասֆալտի երկրորդ շերտը: Իսկ Հայաստան–Վրաստան միջպետական ավտոճանապարհի Ջուջեւան-Նոյեմբերյան հատվածը քարուքանդ է, փոսառատ:
Օգոստոսի 10-ին վարչապետ Նիկոլ Փաշինյանը Տավուշի մարզ կատարած իր աշխատանքային այցի շրջանակներում Բերդի տարածաշրջանից այցելեց Նոյեմբերյան քաղաք, որտեղից մեկնեց Իջեւան քաղաք: Նոյեմբերյանի քաղաքապետարանում կայացած հանդիպման ժամանակ նրան հարց տրվեց Ջուջեւան-Նոյեմբերյան ավտոճանապարհի շատ վատթար վիճակի եւ այդ ճանապարհի նորոգման մասին:
Այդ ճանապարհում այնքան շատ ու խոր են փոսերը, որ վարորդները խուսափելով փոսերից`դուրս են գալիս երթեւեկության հանդիպակաց գոտի`վթարային իրավիճակի ստեղծելով:
Նոյեմբերյանի քաղաքապետարանում Նիկոլ Փաշինյանն ասաց, որ Նոյեմբերյան-Ջուջեւան ավտոճանապարհի հիմնանորոգման գումարները նախատեսված է հատկացնել 2019 թվականին, սակայն ինքը կաշխատի, որ այդ գումարները տրվեն այս`2018 թվականին:
2018թ. մայիսի 7-ից սկսվել են Հայաստան-Վրաստան միջպետական ավտոճանապարհի Սարիգյուղ-Նոյեմբերյան ճանապարհի հիմնանորոգման աշխատանքները: Ճանապարհի կառուցապատումն իրականացնում է «Վառմաշ» ՍՊԸ –ն:
Սարիգյուղ -Նոյեմբերյան ավտոճանապարհին նախատեսվում է կառուցապատել 3 հատվածով, ավելի քան 18 կմ ընդհանուր երկարությամբ ճանապարհ: Այդ աշխատանքների համար նախատեսված է հատկացնել 2 միլիարդ 200 միլիոն դրամ:
Ոսկան ՍԱՐԳՍՅԱՆ
