Շիրակի մարզի Մարալիկ քաղաքում այսօր ևս շարունակվում են բողոքի ցույցերն՝ ընդդեմ Անիի ՀՀԿ-ական համայնքապետ Արտակ Գևորգյանի: Ցուցարարները մի քանի օր է՝ շրջափակել են համայնքապետարանի շենքը՝ չթույլատրելով ներս մտնել, որի պատճառով համայնքապետարանի աշխատակազմը տեղափոխվել է մշակույթի տուն:
«ՀՀԿ հեռացիր, Արտակ հեռացիր», «Անեցիներ, դուխով» վերտառությամբ ցուցապաստառներով բավական մեծ թվով մարդիկ քայլերթ անցկացրեցին՝ նախազգուշացնելով, որ «տոտալիտար համակարգի» հլու-հնազանդ բնակիչներն այլևս չկան:
«Ոչ գաղութատիրությանը, որ հանրապետականի խամաճիկ իշխանություններին, մեր պայքարը ոչ թե անձի, այլ կլանի, հնի, խայտառակվածի, վարկաբեկվածի դեմ է»,-հայտարարեցին ցուցարարները:
Նրանք Անիի համայնքապետից պահանջեցին լքել նաև մշակույթի տունը:
«Մշակույթի տունը թալանչոց տուն մի դարձրեք, դու՝ Արտակ, էնտեղ էլ տեղ չունես, մշակույթի տունն էլ է մերժում է քեզ: Արագ լքի, քանի որ մենք շատ ծրագրեր ունենք մշակույթի տան հետ կապված: Ժամանակ չկա, էս ժողովուրդը քո աշխատակազմի նման պարապ չէ»:
Ցուցարարները Արտակ Գևորգյանին մեկ ժամ ժամանակ են տվել մշակույթի տունը լքելու համար:
Նունե ԱՐԵՎՇԱՏՅԱՆ
