Մինչ մեր հասարակությունն ու լրատվամիջոցները քննարկում են Երևանի քաղաքապետի` Հայկ Մարությանի կողմից Երևան քաղաքի տրանսպորտի գնի վերաբերյալ բարձրաձայնած, այնուհետև պարզաբանած միտքը, մայրաքաղաքի հասարակական տրանսպորտն օր օրի վեր է ածվում իսկական էքստրիմի:
Քաղաքի փողոցները լի են թեքված դիրքով ընթացող ավտոբուսներով ու միկրոավտոբուսներով, իսկ այդ թեքությունը ուղևորների մեծ թվից է, թե տրանսպորտի անսարքությունից կամ գուցե երկուսը միասին` այս խնդիրը շարունակաբար չի լուծվում:
ՀՀ օրենսդրությամբ բացառվում է ուղևորների կանգնած երթևեկությունը, քանի որ «Ավտոմոբիլային տրանսպորտի մասին» ՀՀ օրենքի 14-րդ հոդվածի 3-րդ մասով սահմանված է, որ միկրոավտոբուսներում ուղևորների նստեցումն ու իջեցումը թույլատրվում է երթուղու համար սահմանված կանգառներում` ազատ նստատեղերի առկայության դեպքում: Սակայն հասարակական տրանսպորտի սակավ թվաքանակի պատճառով այս օրենքը շրջանցելը պետությանն այնդքան էլ չի անհանգստացնում:
Վարորդների և ուղևորների միջև ծագած վեճերը առօրյա բնույթ են կրում` ոմանք ուշանում են դասերից կամ աշխատանքից և պետք է տեղավորվեն և չունի նշանակություն թե ինչ դիրքով, ոմանք էլ արդեն տեղավորված են և իրենց մեջքին լրացուցիչ բեռ զգալու բնավ ցանկություն չունեն:
Այսօր ցերեկային ժամերին Երրորդ մասից դեպի Կենտրոն ընթացող 8 համարի միկրոավտոբուսում կարծես թե մարդկանց համար նույնիսկ ձեռք շարժելու ազատ տարածություն չկար, բայց վարորդը չզլացավ սահմանված կանգառում կայանի, որպեսզի կրկին ուղևոր վերցնի, իսկ ուղևորների կողմից բարձրացրած բողոքի ալիքին հակադարձեց` «Դեռ 17 հոգի էլ պետք է տեղավորեմ, բա պլան եմ կատարում, օրը 15000 պլանի փող եմ տալիս, բա տուն փող չտանեմ»:
Ուշագրավ էր, որ այդ օրական 15 000 պլանի գումարից դեռևս գումար չէր ծախսվել միկրոավտոբուսի պատռված նստատեղերը գոնե կարկատելու համար: Իսկ վարորդն իր ագրեսիվ տոնայնությամբ մեկ անգամ ևս դժգոհեց «Ուզում եք մարդավարի գնալ` պլանս քչացրեք»:
Նարա Մարտիրոսյան
