Չնայած Եվրասիական տնտեսական միությունում աշխատանքի ընդհանուր շուկայի ստեղծմանը՝ Միության երկրների քաղաքացիները շարունակում են բախվել միգրացիոն և սոցիալական խնդիրների: Դրանք լուծելու համար Եվրասիական տնտեսական հանձնաժողովում քննարկում են երկարաժամկետ աշխատանքային պայմանագիր ունեցող ԵԱՏՄ քաղաքացիներին ընդունող երկրում ժամանակավոր կամ մշտական կեցության իրավունք տալու հարցը: «Եվրասիական շաբաթ» ֆորումում նման նախաձեռնություն է առաջ քաշել ԵՏՀ աշխատանքային միգրացիայի և սոցիալական պաշտպանության բաժնի փոխտնօրեն Օլեգ Արտամոնովը:
«Այդ նախաձեռնության իրականացումը հնարավորություն կտա պետական մարմիններին առավել արդյունավետ պլանավորել աշխատողների ներգրավումը և օպտիմալացնել նրանց հաշվառումը»,- ասել է Արտամոնովը՝ հավելելով, որ այդ միջոցառումը նաև հնարավորություն կտա նվազեցնել անօրինական միգրացիան և զգալիորեն կրճատել կոռուպցիոն ռիսկերը:
Քննարկման մասնակիցները կողմ են արտահայտվել այդ առաջարկին:
Պատրաստեց՝ Վիկտորյա ԱՆԴՐԵԱՍՅԱՆԸ
