Այսօր Արցախում մեկնարկեց «Արցախ-Հայաստան ռազմավարական դաշինք» ֆորումը: Այն կազմակերպել է ՀՅԴ-ն: Ֆորումը տեղի է ունենում Արցախի խորհրդարանի շենքում: Դրան հրավիրված են Արցախի եւ Հայաստանի քաղաքական ուժերի ներկայացուցիչներ, հասարակական գործիչներ, վերլուծաբաններ:
Ֆորումին ներկա են Հայաստանի խորհրդարանի իշխող ուժի «Իմ քայլը» խմբակցության, ԲՀԿ եւ ԼՀԿ խմբակցությունների ներկայացուցիչները:
Կարդացեք նաև
Ներկա են արտախորհրդարանական ՀՀԿ-ի, ՀԴԿ-ի եւ այլ հասարակական քաղաքական միավորների ներկայացուցիչներ, Արցախի խորհրդարանի բոլոր խմբակցությունների ներկայացուցիչները, խորհրդարանի նախագահը, Արցախի ԱԱԽ ղեկավար Վիտալի Բալասանյանը:
Ներկա է նաեւ առաջին նախագահ Ռոբերտ Քոչարյանի գրասենյակի ղեկավար Վիկտոր Սողոմոնյանը:
Հայ ազգային կոնգրես կուսակցության ներկայացուցիչները ֆորումին չեն մասնակցում: Կազմակերպիչներից հետաքրքրվեցինք` հրավեր ուղարկվե՞լ է: Ի պատասխան փոխանցեցին`հրավերներ ուղարկվել են այն ուժերին, որոնց օրակարգում այս հարցն արդիական եւ կարեւոր է:
Հայաստանում իշխող կուսակցության խմբակցության ներկայացուցիչ, ԱԺ արտաքին հարաբերությունների հանձնաժողովի անդամ Գոռ Գեւորգյանն Aravot.am-ի զրույցում իրենց մասնակցությունը ֆորումին այսպես բացատրեց. «Մենք, առհասարակ կարծում ենք, որ ցանկացած նմանատիպ միջոցառում կարեւոր է եւ միտված է տարբեր հարցերի ևս մեկ անգամ պարզաբանմանը, քննարկմանը, կողմերի ևս մեկ անգամ լուսաբանմանը եւ դրանց վերլուծությանը»:
Հետաքրքրվեցինք Հայաստանում իշխող ուժի աջակցությունն այս գործընթացը կստանա՞: «Մենք, առհասարակ, շատ դրական ենք վերաբերվում, այն տեսակի միջոցառումներին, որոնք միտված են հարցի վերաբերյալ նոր դիտարկումներ, քննարկումներ եւ նոր մեկնաբանություններ անելուն: Նմանատիպ հարթակները ցույց են տալիս, որ կա հանրությանը հետաքրքրող չափազանց կարեւոր հարց, որն ունի բազմաթիվ կողմեր: Բայց լուծումն, ըստ էության, պետք է լինի մեկը. այն պետք է համապատասխանի Արցախի եւ ՀՀ հանրապետությունների ժողովրդի կամքին»,- ասաց Գոռ Գեւորգյանը:
Ֆորումին մասնակցում է նաեւ ՀՅԴ նախկին անդամ Աղվան Վարդանյանը: Նա պատգամավորական մանդատը վայր դրեց եւ կուսակցությունից դուրս եկավ անցած տարի Հայաստանում մեկնարկած հեղափոխական գործընթացների ընթացքում, երբ չքվեարկեց Նիկոլ Փաշինյանի թեկնածության օգտին: Aravot.am-ի դիտարկմանը`դաշնակցականի նախկինը չի լինում, նա այսպես արձագանքեց. «Բա ե՞ս»:
Նելլի ԳՐԻԳՈՐՅԱՆ
