Եվրախորհրդարանն ընդունել է բանաձև՝ կոչ անելով պատժամիջոցներ սահմանել Թուրքիայի նկատմամբ՝ Կիպրոսի հարցում նրա դիրքորոշման պատճառով: Այս մասին հայտնում է «ՌԻԱ Նովոստի»-ն՝ վկայակոչելով Եվրախորհրդարանի մամուլի հաղորդագրությունը:
«Պատգամավորները կոչ են արել ԵՄ խորհրդին պահպանել միասնականությունը Թուրքիայի միակողմանի և անօրինական գործողությունների նկատմամբ և կոշտ պատժամիջոցներ սահմանել»,- ասվում է փաստաթղթում: Բանաձևին կողմ է քվեարկել 631, դեմ՝ 3 խորհրդարանական, 59-ը ձեռնպահ են մնացել:
Ընդ որում, բանաձևում նշվում է, որ «հակամարտության երկարաժամկետ կարգավորումը հնարավոր է միայն երկխոսության, դիվանագիտական ջանքերի և բանակցությունների արդյունքում»:
Միաժամանակ, Եվրախորհրդարանի պատգամավորները կոչ են անում հակամարտության կարգավորման հիմքում դնել միասնական դաշնությունը՝ Կիպրոսի թուրքական և հունական համայնքների համար: «Պատգամավորները կոչ են անում ԵՄ-ին առավել ակտիվ դեր խաղալ ՄԱԿ-ի հովանու ներքո բանակցությունների առաջմղման համար»,- ասվում է փաստաթղթում:
Կարդացեք նաև
Ակնկալվում է, որ ԵՄ պետությունների և կառավարությունների ղեկավարները կքննարկեն Թուրքիայի հետ հարաբերությունները դեկտեմբերի 10-11-ը սպասվող գագաթնաժողովում:
Պատրաստեց՝ Վիկտորյա ԱՆԴՐԵԱՍՅԱՆԸ
