«Այս հապճեպ ընտրությունները չեմ կարծում ճգնաժամի հաղթահարման հարցում շատ բան են փոխելու»,- Radar Armenia-ի ձայնային ուղիղ եթերում հրավիրված տելեգրամյան մամուլի ասուլիսին հայտարարեց քաղաքական գործիչ, նախկին ՊՎԾ պետ Դավիթ Սանասարյանը։
Նա ասաց, որ մասնակցելու են առաջիկա ընտրություններին, բայց հակված չեն դաշինքով մասնակցելու:
Ըստ Դավիթ Սանասարյանի՝ դրանք միակ ընտրությունները չեն լինելու:
Հարցին՝ պատրաստվո՞ւմ են համագործակցել Նիկոլ Փաշինյանի ուժի հետ, նա պատասխանեց. «Այս պահին՝ ոչ: Տարբեր հանգամանքներ կարող են լինեն: Օրինակ, եթե լինի ճգնաժամ, որ իշխանություն չձևավորի, այդ ժամանակ կհասկանանք: Այս պահին ունենք հստակ մոտեցում, որ օրվա իշխանությունը ադեկվատ չէ ստեղծված իրավիճակի հետ կապված, հակառակ դեպքում նոր ընտրության անհրաժեշտություն չէր լինի: Նիկոլ Փաշինյանը քարոզարշավը մի բան էլ շուտ է սկսել, քան օրենքով սահմանված կարգով է արվում»:
Կարդացեք նաև
Խոսելով Հայրենիքի փրկության շարժման մասին՝ նա ասաց. «Նախկինները ոչ թե հայրենիքի փրկության ճակատ են, այլ Նիկոլ Փաշինյանի փրկության ճակատն են: Եթե իրենք չլինեն, Նիկոլ Փաշինյանը չի ունենա այդ փրկությունը»: Նա նշեց՝ այն մարդիկ, որոնք հեղափոխության ժամանակ մեզ պատվիրակել էին, որ այդ օրակարգն առաջ տանենք և համակարգային լուրջ փոփոխություններ իրականացնենք, այդ մարդիկ պիտի նորից պահանջը դնեն, որ պետք է դատական բարեփոխումներ լինեն, ուժայինները փոխվեն:
Իսկ թե որ ուժերի հետ ունեն քննարկումներ, Դավիթ Սանասարյանը չցանկացավ փակագծեր բացել: «Քաղաքացու որոշում» կուսակցության հետ համագործակցության առիթով ասաց. «ՔՈ-ի հետ քննարկում կա, բայց էլի առհասարակ ուղղակի փորձել ենք հասկանալ՝ ինչ իրավիճակ է, և որևէ լուրջ խոսակցություն չկա, որ կուզենամ կիսվել մեր քաղաքացիների հետ»:
Տաթև ՀԱՐՈՒԹՅՈՒՆՅԱՆ
