«Իմ որոշումը կապ չունի քրեական գործի հետ, հակառակ դեպքում ես ավելի վաղ դուրս կգայի և իմ որոշումը կկայացնեի»,- Radar Armenia-ի ձայնային ուղիղ եթերում հրավիրված տելեգրամյան մամուլի ասուլիսի ընթացքում հայտարարեց քաղաքական գործիչ, նախկին ՊՎԾ պետ Դավիթ Սանասարյանը՝ պատասխանելով հարցին՝ եթե չլիներ իր հանդեպ քրեական գործը, հրաժարական կտա՞ր:
Հիշեցնենք՝ Դավիթ Սանասարյանը հայտնել էր՝ արդեն հայտ են ներկայացրել «Ինքնիշխան Հայաստան» կուսակցության գրանցման: Ապրիլի 23-ին լինելու է առաջին համագումարը:
Դավիթ Սանասարյանը պարզաբանեց՝ չէր շարունակի պաշտոնավարելը, քանի որ ասացվածքի տարբերակով՝ նավից թռչելու տարբերակը չէր. «Եթե տեսնում ես՝ քաղաքական ուժը չի կարողանում կատարել իր գործառույթները, նրա գործունեությունը համարժեք չէ ստեղծված իրավիճակին, իշխանությունը կլանային խումբ չէ, որ պարտադիր պետք է երդում տանք ու այդ խմբի հետ մնանք և երկիրը տանենք ժայռից այն կողմ: Նրանք ադեկվատ չեն եղել իրավիճակին»:
Տաթև ՀԱՐՈՒԹՅՈՒՆՅԱՆ
