Կենտրոնական բանկում ապոկալիպտիկ սցենար են մշակել. եթե համավարակի նոր փուլ լինի, գնանք լոքդաունի եւ տնտեսությունը կրկին փակվի, ապա. 2021-ին տնտեսական անկումը կլինի -14 տոկոս՝ անցյալ տարվա -7,4-ի համեմատությամբ: Այս մասին այսօր Կենտրոնական բանկում հրավիրած ասուլիսում ասաց ԿԲ նախագահ Մարտին Գալստյանը: Ըստ նրա, 2020 թվականը չափազանց ծանր տարի էր ֆինանսական համակարգի համար, այն գործել է համավարակով ու պատերազմով պայմանավորված աննախադեպ շոկերի ու բարձր անորոշության պայմաններում: ԿԲ նախագահ նախագահի խոսքով, բայց համակարգն ապահովել է միջնորդության անխափան ընթացքը՝ պահպանելով ռիսկերի կլանման ունակությունը. «Այսինքն՝ համակարգը կապիտալիզացված էր եւ իրացվելի: Մենք էլ ենք որոշակի օժանդակության ծրագրեր իրականացրել, որի արդյունքում բնականոն անցել ենք 2020 թիվը»:
Ըստ ԿԲ նախագահի, չնայած վարկերը մարելու դժվարություններին, վատորակ ակտիվների տեսակարար կշիռն ընդհանուր վարկերի մեջ 7 տոկոսի շրջանակներում է: Անցյալ տարի ավանդների նվազում էլ է եղել: Ավանդների արտահոսքը բանկերից եղել է անցյալ տարվա հոկտեմբեր-նոյեմբեր ամիսներին: Մարտին Գալստյանի խոսքով, արտահոսքին նպաստել են համավարակի եւ ռազմական դրության հետ կապված տնտեսական անորոշությունները: Սակայն այս տարվա մայիսից ավանդների մակարդակը վերականգնվել է:
Նախորդ տարեսկզբի համեմատությամբ վարկերի աճ է արձանագրվել: Մարտին Գալստյանի տվյալներով, վարկային պորտֆելում մեծ տոկոսը բիզնես վարկերն են՝ 66,7 տոկոս, ապա հիփոթեքային վարկերը՝ 23,7 տոկոս, գյուղատնտեսական վարկերը 7,1 տոկոս են կազմում, սպառողականը՝ 2,5: Բայց նվազել են արտարժութային վարկերը:
ԿԲ նախագահն ասաց, որ բիզնես վարկերի աճին էապես նպաստել են կառավարության կողմից իրականացրած հակաճգնաժամային ծրագրերը: Ասաց նաեւ, որ սթրես թեսթերը ցույց են տալիս, որ բանկային համակարգի կապիտալի համարժեքությունը բարձր է մնում պահանջվող նվազագույն 12 տոկոս մակարդակից:
Կարդացեք նաև
Ասաց նաեւ, որ «տնտեսությունը սկսել է շնչել», բայց թե մարդիկ կգնա՞ն ռիսկի, ներդրումներ կանեն եւ բիզնես նախագծեր կիրականացնեն, դժվար է ասել:
«Գուցե մարդիկ ակնկալում են, որ պետությունը պետք է նախորդ տարի իրականացրած տնտեսական աջակցության ծրագրերը շարունակի, որոնք բավական դրական ազդեցություն ունեցան տնտեսության զարգացման համար: Մենք տեսնում ենք, որ մարդկանց մոտ հետաձգված սպառման արդյունք կա: Այսինքն՝ եթե մարդիկ նախընտրում էին լվացքի մեքենա կամ հեռուստացույց ձեռք բերեն, կամ՝ փոխեին, չանեն՝ մինչեւ եկամուտները վերականգնվի նոր անեն»:
Լուսինե ԲՈՒԴԱՂՅԱՆ
