Ձեր թիմը ընտրություններից հետո էլի «նախկինների որսով» է զբաղված, կարդային ջարդեր, վենդետաներ է ասել Փաշինյանը, դա ձեզ դո՞ւր է գալիս: Այս հարցն ուղղեցինք ՔՊ պատգամավոր Հովիկ Աղազարյանին: Նա պատասխանեց. «Բայց ո՞ւր է, է՜, ո՞ւր է»: Թվարկեցինք, օրինակ, Արագածոտնի մարզպետարանում ՀՅԴ-ականին կանչել են ու ասել 15 րոպե քեզ ժամանակ, մի շարք համայնքապետեր արդեն հրաժարական են տվել՝ Աղազարյանն արձագանքեց. «Եթե մարդիկ նախընտրական շրջանում…իրենց գործողությունները չեն համընկել օրենքով սահմանված գործընթացներին, ուրեմն թող կողմնորոշվեն, ինչի՞ մասին է խոսքը»:
Դիտարկմանը՝ Նիկոլ Փաշինյանը սպառնացել է՝ «մուրճով կխփենք դատարկ գլուխներին», դա բռնություն է, օրենքով սահմանված գործընթաց չէ` Աղազարյանը մեկնաբանեց. «Դուք ուղիղ իմաստո՞վ եք հասկանում, հա՞: Փոխաբերական իմաստով ենք մենք հասկանում: Այսինքն, օրենքի ուժ կկիրառենք բոլորին անխտիր: Ընդ որում, Փաշինյանը նաեւ ասում է` ձեռքերը կկտրենք, դուք պատկերացնում եք Նիկոլ Փաշինյանը վերցնելու է սղոցով ինչ-որ մեկի ձեռքերը կտրի՞, այդպե՞ս եք պատկերացնում»:
Ասացինք՝ ամեն ինչ սպասելի է, որովհետեւ կոնկրետ ասֆալտին ծեփելը տեսել ենք՝ Աղազարյանը պատասխանեց. «Չէ, նման բաներ չկան: Եվ երկրորդը՝ ի պատիվ մեր ժողովրդի, մենք այդ փորձությունները շատ բարեհաջող անցանք, հիմա մնում է շարունակենք անցնել այդ ճանապարհով: Որովհետեւ բոլոր գույժերը նախընտրական բախումների մասին չիրականացան ի պատիվ մեր ժողովրդի ու ընդդիմության»:
Հռիփսիմե ՋԵԲԵՋՅԱՆ
