Պատմաբան, դիվանագետ Ժիրայր Լիպարիտյանի «Հայաստան – Թուրքիա. Պետականություն, պատմություն, քաղաքականություն» աշխատությունը վերջապես կդրվի ընթերցողի սեղանին։ Գիրքը լույս է ընծայել «Անտարես» հրատարակչությունը:
Հանրությանը կներկայացվի մեծածավալ աշխատության դեռևս առաջին հատորը. շարքի մյուս հատորները լույս կտեսնեն առաջիկա երկու տարիների ընթացքում: Հատորը ներառում է պատմաբանի՝ տարբեր տարիներին հրապարակված հոդվածներ և հարցազրույցներ, առաջին անգամ հայերեն ներկայացվող վերլուծություններ, մեծ թվով անտիպ նյութեր:
Այս հատորով Ժիրայր Լիպարիտյանը ներկայանում է նաև իբրև պատմաբան. մինչ այս Հայաստանում նրան ավելի շատ ճանաչում էին որպես դիվանագետի:
«Աշխատության մեջ ներկայացված են մի շարք հարցեր: Մասնավորապես, Թուրքիայի հետ հայ ժողովրդի և Հայաստանի հարաբերությունները՝ իրենց անցյալով ու ներկայով, որը կազմում է վերջին 50 կամ ավելի տարիների հայ քաղաքական մտքի առանցքը։ Ինչպես նաև Ցեղասպանությունը՝ որպես անկախության նկատմամբ քաղաքական մտքի առանցք. Հայաստանը կարո՞ղ է անկախ լինել, արդյո՞ք Թուրքիան մեզ նորից պիտի ջարդի, եթե անկախանանք: Արդյո՞ք Ցեղասպանության չճանաչումը Հայաստանի ժողովրդի ու պետության համար վտանգ է ներկայացնում, Հայաստանը պե՞տք է Թուրքիայի հետ հարաբերություններ զարգացնի, թե՞ ոչ»,- նշում է Ժիրայր Լիպարիտյանը:
Կարդացեք նաև
Նրա խոսքով՝ գրքում ներկայացված է Ցեղասպանության պատճառների նոր ուսումնասիրություն, որում ցուցադրվում է հայերից ձերբազատվելու երիտթուրքերի որոշման քաղաքական երեսը։
Գրքում զետեղված են Ցեղասպանության ժխտողականության պատճառներն ու բնույթը մերկացնող հոդվածներ. մասնավորապես՝ Թուրքիայի ղեկավարներ, ներկայիս նախագահ Էրդողանի և նախկին վարչապետ Դավութօղլուի՝ Ցեղասպանության չճանաչման ու մեկնաբանության վերաբերյալ մոտեցումներին առնչվող քննադատական հոդվածներ:
Հատորն արժեքավոր է նաև նրանով, որ մեկնաբանում է Հայաստան-Թուրքիա բարդ հարաբերություններն անկախությունից ի վեր: Անկախության առաջին տարիներին հեղինակը եղել է ՀՀ կողմից Թուրքիայի հետ գլխավոր բանակցողը և կարևոր ճշտումներ է կատարում այդ բանակցությունների վերաբերյալ: Հատորը հիմնավորում է նաև Թուրքիայի հետ հարաբերությունների կարգավորման քաղաքականությունը: Հայաստան-Թուրքիա հարաբերությունների մոտեցումները ներկայացված են պատմական, քաղաքական և հոգեբանական դիտանկյուններից:
Գրքի վերջում զետեղված են նյութեր՝ 2020 թ. Ղարաբաղյան պատերազմին նախորդած և անմիջապես հաջորդած քաղաքական գործընթացների վերաբերյալ:
Այս հատորի տպագրության մեկենասն է Հայաստանի արդյունաբերողների և գործարարների միության նախագահ Արսեն Ղազարյանը։
Մամուլի հաղորդագրություն
