«Առավոտը» հաղորդել էր, որ «Տիկտոկ» սոցիալական ցանցի «MostiMoti» օգտատերը հրապարակայնորեն առաջարկել է 10.000 ԱՄՆ դոլարի դիմաց վնասել Երեւանի քաղաքապետարանի առեւտրի ծառայությունների վարչության պետ Հովիկ Սաֆարյանին, որը կապված է նրա ծառայողական պարտականությունները կատարելու հետ: Aravot.am-ի աղբյուրները հաղորդել էին, որ իրավապահ մարմիններն այս մասին Երեւանի քաղաքապետարանից սեպտեմբերի 3-ին գրություն են ստացել: Երեւանի քաղաքապետարանի առեւտրի ծառայությունների վարչության պետը նույնպես իրավապահներին ներկայացրել է հաղորդում:
«Առավոտի» ֆեյսբուքյան էջին է դիմել MostiMoti բիզնես ընկերության աշխատակից Էդգար Դավթյանը, պնդելով, թե Tiktok-ում MostiMoti էջն իրեն է պատկանում: Նա հրապարակման համար փոխանցել է հետեւյալ գրությունը. «Երևանի քաղաքապետարանի առևտրի վարչության պետ Հովիկ Սաֆարյանն իր ծառայողական պարտականությանը կատարել է գերազանց: Իմ կողմից tiktok սոցցանցում տեղադրված հայտարարությունը պահի տակ, ջղայնության արդյունքում է եղել, որի համար հայցում եմ ներողամտություն»:
Ի դեպ, «Առավոտի» տեղեկություններով՝ Էդգար Դավթյանը սեպտեմբերի 8-ին ներկայացվել է ՀՀ ոստիկանության Երևան քաղաքի վարչություն, տվել խոստովանական բացատրություն ու բաց թողնվել:
