Aravot.am-ի տեղեկություններով, Արթիկ քրեակատարողական հիմնարկի կալանավորներից մեկը՝ 39-ամյա Խ․Զ․-ն, անակնկալի է բերել աշխատակիցներին, անսպասելիորեն անկառավարելի իրավիճակ է ստեղծել։
Հոկտեմբերի 2-ին, առավոտյան ժամը 9․30-ի սահմաններում, քրեակատարողական հիմնարկի աշխատակիցների կողմից պատժախցային և կարանտինային մասնաշենքում հանձնման-ընդունման և խցերում պահվող անձանց հաշվառման ժամանակ սահմանված կարգով բացվել է խցերից մեկի դուռը, որից հետո կալանավորված Խ․Զ․-ն խնդրել է թույլատրել իրեն խցի աղբը թափել ու հայտնվելով ազատության մեջ՝ հանկարծակի սկսել է անհասցե սեռական հայհոյանքներ հնչեցնել աշխատակիցների հասցեին։
Աշխատակիցները փորձել են կարգի հրավիրել նրան, սակայն ապարդյուն․ չենթարկվելով նրանց օրինական պահանջին՝ շարունակել է հայհոյանքները, որից հետո աշխատակիցներին հաջողվել է նրան խուց տեղափոխել։ Կալանավորը չի հանգստացել, հարվածել ու վնասել է խցի դռան փականը։
Փաստի առթիվ Արթիկի և Անիի քննչական բաժնում նախաձեռնվել է քրեական վարույթ՝ խուլիգանություն կատարելու կասկածանքով՝ ՀՀ քրեական օրենսգրքի 297 հոդվածի 1-ին մասի հատկանիշներով։
Կարդացեք նաև
Նշենք, որ կալանավորը մայրաքաղաքից է, նախկինում ևս դատված, մեղադրվում է մարդկանց առողջությանն ուղղված հանցագործություն կատարելու մեջ, ավելի կոնկրետ՝ ՀՀ քրեական օրենսգրքի 166 հոդվածով, որը կոչվում է «Առողջությանը ծանր վնասել պատճառելը»։
Նա Արթիկ քրեակատարողական հիմնարկ է տեղափոխվել 2026 թվականի մայիս ամսից։
