«Արմենիա» ավիաընկերությունն անցած տարվա մայիս-դեկտեմբեր ամիսներին, օդային սահմանների փակ լինելու պատճառով, իրականացրել է 536 էվակուացիոն չվերթներ, ինչի արդյունքում 38 հազար Հայաստանի քաղաքացիներ տարբեր երկրներից տեղափոխվել են Հայաստան։ Այսօր այս մասին «Արմենպրեսի» մամուլի սրահում ասաց «Արմենիա» ավիաընկերության փոխտնօրեն Գեւորգ Խաչատրյանը:
«2020 թվականի մարտի 15-ին կորոնավիրուսային հիվանդության պատճառով փակվեց ՀՀ օդային տարածքը։ Մոտ 2-3 ամիս «Արմենիա»-ն, ինչպես նաեւ աշխարհում շատ այլ ավիաընկերություններ դադարեցրին իրենց գործունեությունը եւ թռիչքներ չէին կատարում։ Նույն թվականի մայիս ամսից սկսած «Արմենիա» ավիաընկերությունն աստիճանաբար սկսեց վերականգնել իր չվերթները։ Մենք այդ պահին օգտագործում էինք մեր ամբողջական ռեսուրսի գրեթե 10 տոկոսը»,-ասաց պարոն Խաչատրյանը։
Էվակուացիոն չվերթների հիմնական ուղղություններն, ըստ նրա, եղել են Ռուսաստանի քաղաքները, Ֆրանսիայի Լիոն քաղաքն ու Արաբական Միացյալ Էմիրություններից՝ Դուբայը։
44-օրյա պատերազմի ընթացքում էլ, Գեւորգ Խաչատրյանի խոսքով, երբ օտարերկրյա ավիաընկերությունները հրաժարվել են դեպի ՀՀ չվերթներ կատարել, իրենց ավիաընկերությունը տեղափոխել է 172 տոննայից ավել հումանիտար օգնություն դեպի Հայաստան. «Բոլոր օգնությունները եղել են Ռուսաստանի տարբեր քաղաքներից, Ֆրանսիայի Մարսել եւ Լիոն քաղաքներից։ Հատուկ չվերթներ ենք իրականացրել նաեւ Բեյրութ, նաեւ այնտեղից ենք հումանիտար օգնություն տեղափոխել։ Հատկանշական էր, որ պատերազմի ընթացքում նկատվեց նաեւ տարբեր երկրներից չվերթների կրճատում: Ի պատիվ մեր հայ օդաչուների, թռիչքային անձնակազմի, «Արմենիա» ավիաընկերությունը ոչ միայն չկրճատեց իր չվերթները, այլեւ դրանք ավելացրեց ըստ անհրաժեշտության»:
Կարդացեք նաև
Անդրադառնալով 2021 թվականի փետրվար ամսից մինչ օրս կատարած բոլոր չվերթներին, Գեւորգ Խաչատրյանն ասաց, որ այդ չվերթներով տեղափոխել են շուրջ 155 հազար ուղեւոր: Ավիաընկերությունը մինչեւ այս տարվա վերջ 280-300 հազար ուղեւոր էլ կտեղափոխի՝ պայմանավորված ամանորյա տոներով:
Լուսինե ԲՈՒԴԱՂՅԱՆ