ԱԺ նիստում շարունակվում է «Հայաստան» խմբակցության ներկայացրած ՍԴ դատավոր Սեդա Սաֆարյանի լիազորությունները դադարեցնելու հարցով ՍԴ դիմելու որոշման նախագծի քննարկումը: Այն հանձնաժողովում բացասական եզրակացություն էր ստացել:
«Հայաստան» խմբակցության պատգամավոր Ագնեսա Խամոյանն ընդգծեց Սաֆարյանի խախտման հարցով ՔՊ-ականների գնահատականները՝ մոռացություն, անփութություն, տեխնիկական խնդիր. «Իրավիճակը ավելի փորձեց գեղեցկացնել Սերգեյ Բագրատյանը՝ էմոցիոնալ հարցադրում հնչեցնելով, թե ի՞նչ եք հետապնդում: Պարո՛ն Բագրատյան, ի՞նչ էին հետապնդում ձեր կողքին նստած գործընկերները, երբ ձեր նախկին կուսակցության ղեկավարին էին գրեթե նույն հիմքով զրկում անձեռնմխելիությունից: Ու այս ձեւակերպումները անում են իշխանական պատգամավորներ, մարդիկ, ովքեր Հրայր Թովմասյանի նվիրած գրիչից մի ամբողջ լեգենդ են հյուսել, ովքեր դատավոր Գագիկ Խանդանյանի լիազորությունները դադարեցրել են, որովհետեւ 1 օր զբաղվել է ձեռնարկատիրական գործունեությամբ»:
Ըստ նրա, քանի որ Սեդա Սաֆարյանը ընդդիմադիր չէ ու իրենց համար ոչ ցանկալի անձանց ցուցակում չէ, նրա խախտումը որակում են անփութություն եւ մոռացություն. «Դուք փաստում եք, որ Սեդա Սաֆարյանը թույլ է տվել խախտում, թող գնա հարցը ՍԴ, ՍԴ-ն որոշի»:
Հռիփսիմե ՋԵԲԵՋՅԱՆ
