2022 թվականին ԱԺ «Քաղաքացիական պայմանագիր» կուսակցության անդամ Վիգեն Խաչատրյանի՝ facebook-յան գրառման տակ ծնունդով Արցախից, բայց չեխաբնակ պատմաբան Աշոտ Առաքելյանի (լուսանկարում) թողած մեկնաբանությունը իր իսկ գլխին իսկական պատուհաս է դարձել: Չեխաբնակ պատմաբանին մեկնաբանության համար մեղադրանք են առաջադրել:
Նրա խոսքով, Վիգեն Խաչատրյանի գրառման տակ ինքն ընդամենը գրել էր՝ Նիկոլ Փաշինյանին հեռացնելու երկու օրինական ճանապարհ կա՝ կամ ընտրություններով, կամ վերացնելով, բայց նրա որոշ թերություններ եւ սխալներ: Պատմաբանի խոսքով, իրավապահներն իր այս գրառումից վերցրել են «հեռացնել, վերացնել» բառերը ու բռնության կոչ համարելով՝ մեղադրանք առաջադրել. «Ես Արցախում երկհարկանի տուն եմ կորցրել, այդ պահին կարող է մտքերս հայտնել եմ, բայց ֆիզիկապես վերացնելը նկատի չեմ ունեցել: Ոնց որ էն որ մայրը ջղայնացած ժամանակ զավակին ասում է՝ թաղեմ բոյդ, հո սրտանց չի՞ ասում, հիմա այդ խնդիրն է: Հիմա եկել եմ Հայաստան, այդ քրեական վարույթի համար իմ ելքը երկրից արգելել են, չեմ կարողանում վերադառնալ Չեխիա»:
Մեր զրուցակիցն ասաց` Վիգեն Խաչատրյանի հետ առերեսում վարույթ իրականացնող մարմնում չի եղել, Խաչատրյանի հետ հեռախոսազրույց է ունեցել, ինչի ընթացքում վերջինս չի մտաբերել իր գրառումը, որի տակ թողած մեկնաբանության համար էլ պատմաբանին մեղադրանք են առաջադրել:
Աշոտ Առաքելյանը դիմել է նաեւ Չեխիայի հանրապետության դեսպանություն, ասել են՝ քանի որ նաեւ ՀՀ քաղաքացի եք, բարդություններ լինելու դեպքում նոր դիմեք մեզ:
Կարդացեք նաև
Պատմաբանին մեղադրանք է առաջադրվել Քրեական օրենսգրքի բռնություն գործադրելու հրապարակային կոչերը, բռնությունը հրապարակայնորեն արդարացնելը կամ քարոզելը, ինչպես նաև այդ նպատակով նյութեր կամ առարկաներ տարածելու հատկանիշներով :
Արփինե ՍԻՄՈՆՅԱՆ
