Հունվարի 13-ին եւ 14-ին «Արամ Խաչատրյան» համերգասրահում Հայաստանի ազգային ֆիլհարմոնիկ նվագախումբը հանդես եկավ Christmas Sinatra համերգային ծրագրով, որի ընթացքում Ֆրենկ Սինատրայի սիրված երգերը հնչեցին բրիտանացի ջազային երաժիշտ, կոմպոզիտոր, գործիքավորող, շեփորհար եւ երգիչ Մարվին Մուոնեկեի կատարմամբ, իսկ համերգի հատուկ հյուրն էր փոփ երգչուհի` Քելլի Յանգը՝ դարձյալ Մեծ Բրիտանիայից: Նվագախումբը ղեկավարում էր ՀՀ ժողովրդական արտիստ Երվանդ Երզնկյանը:
«Բարի երեկո, բարի…Բարի Ուայթ»,-հայերեն ողջույնով բառախաղի դիմեց Մարվին Մուոնեկեն: Նա եւ Քելլի Յանգը տառացիորեն բոցավառեցին դահլիճը, Նոր տարին ունկնդրի համար հին տոմարով եկավ հենց նրանց երգերով: Վերջում՝ բիս երգելուց հետո, բրիտանացիները հոտընկայս ծափահարություններով ու բրավոների տարափով երախտագիտությունն ու հիացմունքն արտահայտած հանդիսատեսին խոստացան հաջորդ տարի եւս այցելել Հայաստան:
Կարդացեք նաև
Մարվին Մուոնեկեն, որ բրիտանական «The Voice» և «Got Talent» մրցույթների ամենավառ մասնակիցներից է, համերգից օրեր առաջ կայացած ասուլիսում լրագրողներին ասել էր, որ իր համար մեծ նշանակություն ունի Սինատրայի թողած համաշխարհային ժառանգությունը, քանի որ նա պայքարել է սեւամորթների իրավունքների համար:
Մարվին Մուոնեկեն մեծ պատիվ է համարել նաեւ Հայաստանի ազգային սիմֆոնիկ նվագախմբի ընկերակցությամբ «Արամ Խաչատրյան» համերգասրահում հանդես գալը:
Մուոնեկեն եւ Քելլի Յանգն առաջին անգամ էին մեր երկրում, անչափ ոգևորված էին, ինչի մասին հայտնեցին բեմից: Երգչուհու համար հետաքրքիր փորձառություն էր Հայաստանի ազգային սիմֆոնիկ նվագախմբի հետ հանդես գալը, քանի որ մինչ այդ նա ելույթ է ունեցել միայն ջազային բենդերի հետ:
Համերգին մասնակցում էր նաեւ Ձայնի պահպանման վոկալ-երգչախմբային մասնագիտական դպրոցի երգչախումբը, որի գեղարվեստական ղեկավարը Կարինե Առաքելյանն է:
Գոհար ՀԱԿՈԲՅԱՆ
