Երեւանի ընդհանուր իրավասության առաջին ատյանի քրեական դատարանում այսօր ավարտվեցին «Ազգային ժողովրդավարական բևեռի» անդամ 68-ամյա Տիգրան Դերմոյանի գործով հիմնական դատալսումները:
Հիշեցնենք, որ 2024 թվականի ապրիլի 24-ին վարչապետ Նիկոլ Փաշինյանի կնոջ՝ Աննա Հակոբյանի և նրա դստեր՝ Ծիծեռնակաբերդի հուշահամալիրի անմար կրակին մոտենալու ընթացքում «Ազգային ժողովրդավարական բևեռի» մի քանի անդամներ, այդ թվում՝ Տիգրան Դերմոյանը վանկարկել են «Նիկոլ, դավաճան», «Նիկոլ, հողատու» եւ նմանատիպ արտահայտություններ:
Միջադեպից հետո 68-ամյա Տիգրան Դերմոյանը ձերբակալվել ու նրան մեղադրանք է առաջադրվել:
Կարդացեք նաև
Հանրային մեղադրողն այսօր դատարանում ասաց՝ գտնում է, որ նախաքննական մարմնի կողմից հիմնավորվել է մեղադրանքը, նրան մեղսագրված արարքը որակված է ճիշտ:
Հանրային մեղադրողը նաեւ արձանագրեց, որ խոսքի ազատությունը չի ներառում ատելության խոսքը, այն խոսքի ազատության սահմաններից դուրս է. «Տիգրան Դերմոյանը, գտնվելով Ծիծեռնակաբերդի հուշահամալիրի անմար կրակի մոտ ՀՀ վարչապետի կնոջ ու նրա անչափահաս դստեր՝ անմար կրակին մոտենալու ընթացքում օգտագործելով հասարակության շրջանում հուզականության բարձր մակարդակը, Աննա Հակոբյանի ու նրա դստեր ինքնասիրությունն ու արժանապատվությունը նվաստացնելու , մտացածին գաղափարներով ու հայացքներով հայ ազգի շրջանում ատելություն, խտրականություն, քաղաքական խմբի նկատմամբ անհանդուրժողականություն, թշնամանք հրահրելու եւ քարոզելու դիտավորությամբ, մի խումբ անձանց հետո մոտ 10 րոպե վանկարկել է «Նիկոլ հողատու, Նիկոլ դավաճան, Նիկոլ թուրք, Նիկոլ թշնամի, Նիկոլ ցեղասպան», որը ուղիղ եթերով հեռարձակվել է մի շարք լրատվամիջոցներով ու այդ լրատվական կայքերի սոցիալական հարթակներում»:
Հանրային մեղադրողը նաեւ միջնորդեց, որ դատարանը մեղավոր ճանաչի Տիգրան Դերմոյանին:
Արփինե ՍԻՄՈՆՅԱՆ
