44-օրյա պատերազմի հետևանքով անհետ կորած զինծառայողների հարազատները բողոքի ցույց են անում ԱԺ շենքի առաջ՝ պահանջելով հրապարակել 44-օրյա պատերազմի հետեւանքները քննող հանձնաժողովի զեկույցը։
«Մեր պահանջն է, որ մեր հանձնած դիմումի համաձայն՝ ԱԺ դահլիճի գլխավոր ամբիոնը տրամադրեն, որպեսզի լսումներ կազմակերպվեն: Մենք 191 հոգու մասնակցության ցուցակ ենք ներկայացրել, սակայն ԱԺ պատգամավոր Թագուհի Թովմասյանի փոխանցմամբ՝ իրենք փոքր դահլիճ են տրամադրում: 70 հոգանոց դահլիճում չենք կարող տեղավորվել, որովհետեւ միայն 100 հոգուց ավել ծնող է գալու»,-ասաց հարազատներից մեկը:
«Իրենք ասել են՝ կրճատեք ցուցակը, բայց ո՞ր ծնողին ասես՝ դու մի արի: Առայժմ կուլտուրական հորդորում եմ փոխել այդ որոշումը՝ մինչեւ վաղը ժամը 12-ը լսումների սկսվելը»,-ասաց նա:
«Ազգային ժողովը ազգի տարածքն է, ազգը պիտի մտնի, դուրս գա: Մեկ էլ Նիկոլ Փաշինյանին հիշեցնեմ, որ ովքեր գրանցվել են ԱԺ գլխավոր ամբիոնից ելույթ ունենալու համար, նրանք էլ դրա իրավունքն ունեն, վարչապետներ են, ոնց որ ինքը»,-ասաց անհետ կորածի մեկ այլ հարազատ:
Կարդացեք նաև
Արցախցի հասարակական-քաղաքական գործիչ, «Վերածնվող Արցախ» ՀԿ նախագահ Անաստաս Իսրայելյանը նշեց, որ արցախահայերի պահանջն է ի վերջո տեղեկանալ, թե ում կողմից է եղել Արցախի հանձնումը. «Ժողովուրդը պետք է տեղեկանա դավաճանության մասին,որ վաղը ընտրությունների գնալիս նորից դավաճանին չընտրի»:
Գոհար ՀԱԿՈԲՅԱՆ
