Այսօր պատմության մեջ առաջին անգամ կկայանա Հայաստան- ԵՄ գագաթնաժողովը։
Մինչ այդ ԵՄ արտաքին գործերի և անվտանգության քաղաքականության հարցերով բարձր ներկայացուցիչ Կայա Կալասն ամփոփել է Երեւանում երեկ տեղի ունեցած ԵՔՀ ութերորդ համաժողովը.
Եվրոպան միայն աշխարհագրություն չէ, այն նաև մեր կողմից դավանվող արժեքների և սկզբունքների մասին է: Այդ իսկ պատճառով ես ուրախ էի Հայաստանում մասնակցել Եվրոպական քաղաքական համայնքի 8-րդ հանդիպմանը:
Մայրցամաքի 48 առաջնորդներ, ինչպես նաև Կանադան՝ որպես հյուր, հավաքվել էին Երևանում՝ քննարկելու, թե ինչպես ավելի սերտ համագործակցել խորը աշխարհաքաղաքական վերափոխումների ժամանակաշրջանում:
Կարդացեք նաև
ԵՔՀ
Մենք խոսեցինք այն մասին, թե ինչպես համակարգել գործողությունները՝ ժողովրդավարական դիմակայունությունն ամրապնդելու, փոխկապակցվածությունն առաջ մղելու և տնտեսական ու էներգետիկ անվտանգությունը հզորացնելու համար: Քննարկումները կենտրոնացած էին նաև այն սպառնալիքների դիմակայման վրա, որոնց բոլորս բախվում ենք:
Ուկրաինային նվիրված միջոցառում
Նախագահ Զելենսկու և գործընկերների հետ մենք քննարկեցինք, թե էլ ինչ կարող ենք անել՝ աջակցելու Ուկրաինային ռուսական ագրեսորի դեմ պայքարում: Ուկրաինայի կարիքները մնում են նույնքան հրատապ, որքան երբևէ: Մեր 90 միլիարդ եվրոյի վարկը կենսական ֆինանսավորում է ապահովում բյուջետային և պաշտպանական կարիքների համար: Մենք Ուկրաինային կտրամադրենք այն ամենը, ինչ անհրաժեշտ է իր դիրքերը պահպանելու համար, քանի դեռ Պուտինը չի հասկացել, որ իր պատերազմը ոչ մի տեղ չի տանում:
Հայաստանի հարցերով հիմնական խումբ
Հայաստանը բախվել է բարդ նախընտրական միջավայրի, որը նշանավորվել է հիբրիդային սպառնալիքներով, ներառյալ ապատեղեկատվական արշավները և արտաքին ազդեցության գործողությունները: Հիմնական խումբը հանդիպեց՝ համակարգելու Հայաստանին տրամադրվող աջակցությունը: Անցած տարվա ընթացքում ԵՄ-Հայաստան գործընկերությունը խորացել է աննախադեպ տեմպերով: Մենք մեծ ներդրումներ ենք անում երկրի դիմակայունության գործում և աջակցում ենք գալիք ընտրությունների ամբողջականությանը:
Մոլդովայի հարցերով հիմնական խումբ
Ռուսաստանը շարունակում է խաթարել Մոլդովայի եվրոպական ապագան՝ նպատակաուղղված ապակայունացման արշավի և ԵՄ ուղու նկատմամբ հանրային վստահությունը խարխլելու շարունակական ջանքերի միջոցով: Եվրոպական ինտեգրումը և անվտանգությունը նույն մետաղադրամի երկու երեսներն են. որքան Մոլդովան մոտենում է ԵՄ-ին, այնքան ավելի դիմակայուն և պաշտպանված է դառնում:
Թեև Եվրոպական քաղաքական համայնքի հանդիպումն ավարտվեց, մենք Երևանում շարունակում ենք աշխատանքը` պատմության մեջ առաջին ԵՄ-Հայաստան գագաթնաժողովովն անցկացնելով։
Թարգմանությունը՝ Ա1+-ի
