Կապսի ջրամբարի կառուցմամբ Ամասիայի տարածաշրջանի ձորերի մեջ մխրճված գյուղերից մեկը՝ Ջրաձորն էլ տեղափոխելու էին 5 կիլոմետր հեռավորության վրա՝ Գյումրիին ավելի մոտ։ Ջրաձորցիների համար նոր գյուղ էին կառուցելու՝ էկոգյուղ՝ հին տեղանքի դեմ-դիմաց։
Նիկոլ Փաշինյանը կառավարության նիստում այս մասին խոսելիս ասաց․ «Շատ կարևոր է, որ այդ նախագիծը հաջող ընթանա, և մենք կարողանանք այնտեղ 21-րդ դարի գյուղի մոդել ներդնել ու քաղաքաշինական նոր կուլտուրա բերենք, որը համապատասխանի մեր այսօրվա ակնկալիքներին ու պահանջներին»։
Կապսի ջրամբարի կառուցման դեպքում Ջրաձորը չի կարող մնալ նույն տեղում, այն կանցնի ջրի տակ, հետևաբար և դրանով է պայմանավորված նոր գյուղ կառուցելու մտադրությունը։
Կարդացեք նաև
Ջրաձորցիները ի սկզբանե չէին հավատում, որ այս ծրագիրը իրականություն կդառնա։ Aravot.am-ի հետ զրույցում նրանք ասում էին, որ գյուղի տեղափոխման ծրագիրը դեռ խորհրդային տարիներից՝ 70-ական թվականներից է մշակվել, սակայն այդպես էլ չի իրագործվել։ Խորհրդային շրջանում էլ սկսվել էր ջրամբարի կառուցման փուլը, միևնույն ժամանակ պիտի իրականացնեին գյուղի տեղափոխումը, որն այդպես էլ հօդս է ցնդել։
4 տարի առաջ տեղի ունեցած կառավարության նիստից հետո սկսվեց Կապսի ջրամբարի շինարարությունը։ Այս նպատակի համար միջազգային մրցույթ հայտարարվեց, որը շահեց չինական «Շանսի Քոնսթրաքշն Ինվեսթմենթ Գրուպ» ընկերությունը, որի հետ սակայն Հայաստանի կառավարությունը 2025 թվականին դադարեցրեց պայմանագիրը, ու չինացիները հեռացան Հայաստանից՝ ըստ էության ձախողելով թե՛ ջրամբարի, և՛ թե նոր գյուղի կառուցումը։
Այս նպատակի համար գերմանական KFW բանկը 68.5 միլիոն եվրոյի վարկ էր տրամադրել, Հայաստանի կառավարությունն էր՝ 26․7 միլիոն եվրո։ Կառավարությունը 5 միլիարդ դրամ էլ հատկացրել էր նոր գյուղ կառուցելու ու Ջրաձոր համայնքը տեղափոխելու համար։ Նոր գյուղի կառուցման մեկնարկը պիտի տրվեր 2021 թվականի դեկտեմբերի 2-ին ու պատրաստ լիներ մինչև 2026 թվականի գարնանը։
Ինչևէ, երկու օր առաջ աշխատանքային այցով Գյումրիում գտնվող տարածքային կառավարման և ենթակառուցվածքների նախարար Դավիթ Խուդաթյանից լրագրողները հետաքրքրվեցին, թե ի՞նչ եղավ Կապսի ջրամբարի շինարարությունը, ե՞րբ է վերսկսվելու։
«Պայմանագիրը չինական կապալառու ընկերության հետ արդեն խզվել է, հիմա մենք նոր նախագծի պատվիրման փուլում ենք, որ որտեղ գոյություն ունեցող ծավալները կկրկնապատկվեն, և նոր նախագիծը վերաբերվելու է արդեն 60 միլիոն խորանարդ մետր ծավալի։ Այս մասով նախագիծը պատրաստ լինելուն պես՝ միջազգային ընթացակարգերին համապատասխան կդրվի մրցույթի, և ես հույս ունեմ և վստահ եմ, որ մենք մյուս տարվա սկիզբ շինարար կունենք և արդեն շինաշխատանքները կսկսվեն», – ասաց Դավիթ Խուդաթյանը։
Նունե ԱՐԵՎՇԱՏՅԱՆ
