Aravot.am-ի տեղեկություններով, Շիրակի մարզային քննչական վարչության Ախուրյանի քննչական բաժնում խուլիգանություն կատարելու կասկածանքով սկսել են ուսումնասիրել մարզի դպրոցներից մեկում տեղի ունեցած մի դեպք, որի առանցքում պաշտոնատար անձին նմանակելը, ծաղրելն ու նրա հասցեին հայհոյանք հնչեցնելն է։
Թե ով է այդ պաշտոնատար անձը, դեռևս չի հանրայնացվում, սակայն տարօրինակ է, որ դեպքը տեղի է ունեցել մոտ երկու տարի առաջ, հիմա նոր՝ ավելի կոնկրետ սեպտեմբերի 17-ին է հայտնվել Ամասիայի ոստիկանության ուշադրության կենտրոնում ու անմիջապես ուղարկվել քննության՝ Ախուրյանի քննչական բաժին։
Սեպտեմբերի 17-ին Համայնքային ոստիկանության գլխավոր վարչության Ամասիայի բաժնում տեղեկություններ են ստացել առ այն, որ մոտ երկու տարի առաջ Բյուրակն գյուղի միջնակարգ դպրոցում մի տեսահոլովակ է նկարահանվել, որտեղ 54-ամյա կին աշխատակցուհիներից մեկը ծաղրական շարժումներով նմանակում է պաշտոնատար անձին ու նրա հասցեին սեռական հայհոյանքներ հնչեցնում։
Ոստիկանությունը տեղեկություններ է ստացել, որ տեսահոլովակը նկարահանել է նույն դպրոցի ուսուցչուհիներից մեկը, ինչին ականատես են եղել 4 աշխատակիցներ, այդ թվում դպրոցի տնօրենը։
Կարդացեք նաև
Ոստիկանությունը պարզել է թե՛ նկարահանում իրականացրած երիտասարդ ուսուցչուհու , թե՛ ականատեսների ինքնությունը ու փաստացի սկսել է պատասխանատվության ենթարկել պաշտոնատար անձին քննադատողին։
