ՀՀ նախագահին ուղղված Արծրուն Մարգարյանի թիկնապահ Արսեն Խաչատրյանի ծնողների դիմումը անպատասխան չի մնացել։ Երեկ Արսենի մայրը կես ժամով որդուն տեսակցելու թույլտվություն է ստացել։
«Առավոտին» տիկին Աիդան պատմեց հետեւյալը. Արսենը ասել է, որ իրեն ձերբակալելուց հետո, 6-րդ վարչությունում նոր իմացել է, որ գեներալ Մարգարյանը սպանված է։ Արսենին ՊԱԿ-ի մեկուսարանում ծեծել են (բայց այնպես, որ մարմնի վրա հետքեր չերեւան), ապա նրա հետ «աշխատել է» հատուկ հոգեբանը։ Վերջինս «նրա ականջը լցրել է», որ եթե չստանձնի սպանությունն, իրեն կխոշտանգեն։ Այդ ճնշման տակ Արսենը մեղքն իր վրա է վերցրել։ Մոր հետ տեսակցելու ընթացքում նա անընդհատ կրկնել է. «Մամա, ես չեմ սպանել, չգիտեմ՝ ով ա արել»։ Արսենին նաեւ ստիպում են ասել երրորդ մարդու անունը, որը, հնարավոր է, հենց սպանել է Մարգարյանին։ Չասելու դեպքում մեղքը կընկնի դարձյալ Արսեն Խաչատրյանի վրա։
Ավելին տիկին Աիդան ի վիճակի չէր ասել։ Նրա հետ կապը կպաշտպանենք եւ առաջիկա համարում հնարավորինս կներկայացնենք այս դեպքի մանրամասները։ Արսեն Խաչատրյանը Սովետաշենի թիվ 1 մեկուսարանում է։
Լ. Ա.
