ԱԺ համամասնական եւ մեծամասնական ընտրություններին, ըստ նախնական ցուցակների, Գեղարքունիքի մարզից կմասնակցի 182 749 ընտրող, որից 57 240-ը կքվեարկի թիվ 22 ընտրատարածքի 37 ընտրական տեղամասերում:
Ըստ թիվ 23 ընտրատարածքային ընտրական հանձնաժողովի նախագահ Կարեն Լեւոնյանի` նախնական հաշվարկով, ընտրություններին կմասնակցի 61 509 ընտրող` 70 ընտրական տեղամասերում:
Թիվ 24 ընտրատարածքային ընտրական հանձնաժողովի նախագահ Սարո Ղազարյանի տեղեկացմամբ` այդ ընտրատարածքի 46 ընտրական տեղամասերում ընտրությանը կմասնակցի 64 հազար ընտրող:
Ընտրական հանձնաժողովների նախագահները հայտնում են, որ ապրիլի 6-11-ը կավարտվի տեղամասային հանձնաժողովների կազմավորման գործընթացը:
Ընտրողների ցուցակների հետ կապված անճշտությունների կամ դիմումների վերաբերյալ ճշտումների մասին ոչ մի դիմում չի գրանցվել Գավառի անձնագրային բաժանմունքում: Մարտունու անձնագրային բաժանմունքի պետ Սարիբեկ Մաթեւոսյանը հայտնեց, որ քաղաքացիները հիմնականում դիմում են հասցեների ճշտման հարցերով: Բնակիչները չեն գտնում իրենց անունները ցուցակներում, սակայն բաժանմունքի աշխատակիցները գտնում են նրանց անուններն ու ուղղորդում համապատասխան ընտրական տեղամասեր: Ըստ Ս. Մաթեւոսյանի` ընտրացուցակներում եղել է 49 մահացած մարդու անուն, որից 18-ի անունները դուրս են բերվել ցուցակներից` մահվան վկայականների հիման վրա, իսկ մնացածների համար դիմել են գյուղապետերին` համապատասխան գրություն-տեղեկանք ներկայացնելու եւ մահացածներին ցուցակներից դուրս հանելու համար: Մահացած ընտրողների անուն-ազգանունները դուրս են գրվում ցուցակներից եւ ոչ թե ընտրողների ռեգիստրից:
Սեւանի անձնագրային բաժանմունք հիմնականում դիմել են այն քաղաքացիները, ովքեր չեն գտել իրենց անուն-ազգանունները ցուցակներում: Եվ ըստ բաժնի պետ Խաչիկ Կիրակոսյանի` տեղում ճշտվում են տվյալներն ու համապատասխան վայրերը, ուր նրանք չեն գտնում իրենց անունները: Ցուցակներում լինում են նաեւ անճշտություններ` կապված բնակավայրերի տեղափոխման հետ: Ցուցակներում կան նաեւ մահացածների անուն-ազգանուններ, ովքեր հիմնականում մահացել են Ռուսաստանի Դաշնությունում, եւ հարազատների դիմում-բացատրություններով՝ նրանց անունները դուրս են գրվում ցուցակներից:
Ճամբարակի անձնագրային բաժնում եւս դիմում են հասցեների ճշտման հարցերով: Ըստ բաժնի պետ Կամելլա Եգանյանի` շուրջ 10 մահացածների անուն-ազգանուններ դուրս են գրվել ցուցակներից: Վարդենիսում անճշտությունները հիմնականում կապված են հասցեների տեղափոխման եւ զինծառայության ավարտից հետո հաշվառման չանցնելու հետ:
Անի ՊՈՂՈՍՅԱՆ
