«Ցուցադրականությունը ամեն ինչում է, դա ինքնահաստատվելու եւ անլիարժեքության դրսեւորում է»,- այսօր լրագրողների հետ հանդիպման ժամանակ նշեց հոգեբան Սամվել Խուդոյանը:
Նրա պնդմամբ՝ 7 օր ամանորյա ճոխություն թույլ տալը անհեթեթություն է, տոնը դրական բան է, սակայն սթրեսների առկայություն նույնպես կա.
«Ձմեռը վտանգավոր շրջան է, ամուսնալուծությունները եւ կոնֆլիկտները ավելանում են: Ամանորը վերածվում է սթրեսի շատերի համար` մանավանդ կանանց, լավ ուրախանալուց հետո մի պահ դատարկություն է գալիս»:
Ազգագրագետ Ռուզաննա Ազիզյանի համոզմամբ՝ ցանկացած տոն անցումային պահ է պարունակում: Ամանորը ամենաառանցքային տոնն է` տարվա մի փուլից մյուսի անցումն է.
Կարդացեք նաև
«Մենք ձեւավորված ավանդույթի համաձայն դեռեւս տոնն իմաստավորում ենք կերուխումի սեղանի շուրջ` կերակուրի միջոցով մարդը ցուցադրում է իր ճաշակը: Ցանկացած տոնակատարություն եւ ատրիբուտ իր մեջ իմաստ է պարունակում, այդպես ապահովվում է հաջորդ տարվա առատությունն ու ճոխությունը»:
Ազգագրագետի խոսքով՝ նյութական բարեկեցության մակարդակի բարձրացումը իր հետ բերում է փոփոխություններ: Մարդը ցուցադրում է իր ունեցած առավելագույնը՝ փորձելով շահել բարեկամների եւ հարազատների համակրանքը.
«Հասարակական արժեքները մեկ օրում չեն փոխվում, նախկինում միատարր էր տոնակատարության սցենարը, իսկ վերջին տարիներին սցենարները բազմազան դարձան: Տոնի գլխավոր առանցքը հարազատների եւ ուտելիքների առատությունն է, քանի որ Նոր տարին խորհրդային ավանդական տոն է»:
Անժելա ՇԱՀՈՒՄՅԱՆ
