Տավուշում գործազրկությունը մեծ տոկոս է կազմում, Ռուսաստան արտագնա աշխատանքի մեկնելու շնորհիվ գործազրկությունը որոշ չափով մեղմվում է: Գարնան գալու հետ մարզի բազմաթիվ բնակիչներ հավաքում են ճամպրուկները, մեկնում արտագնա աշխատանքի: Ռուսաստան աշխատանքի գնացողներն այժմ շվարած են: ՌԴ-ում օրենք է ընդունվել, որի համաձայն՝ այդ երկիր առանց վիզայի մուտք ունեցող երկրների քաղաքացիներն այսուհետ Ռուսաստանում կարող են բնակվել 90 օրից ոչ ավել՝ 180 օրվա ընթացքում: Եթե նախկինում հայ «խոպանչին» կարող էր անցնել հարեւան Ուկրաինա եւ անձնագրում համապատասխան դրոշմ ունենալով՝ վերադառնալ Ռուսաստան եւ շարունակել աշխատել, հիմա 3 ամիս աշխատելուց հետո ստիպված կլինի լքել երկիրը:
Տավուշցիները Ռուսաստանում հիմնականում շինարարության ոլորտում են աշխատում՝ ամիսը միջինը 1000-1200 դոլար աշխատավարձով: Եթե աշխատած գումարից հանում ենք Ռուսաստան մեկնելու եւ վերադարձի, այնտեղ մնալու, սննդի ծախսերը, ակնհայտ է, որ 3 ամիս անց «խոպանչին» չի կարող մեծ գումարով տուն վերադառնալ: Նախկինում մասնավոր հիմնարկներում աշխատելու համար օտարերկրացիներին պետության կողմից «տենդերներ» են տրվել` ամիսը 1000 ռուսական ռուբլի վճարով: «Խոպանչիների» շրջանում խոսակցություններ կան, որ «տենդերի» համար վճարը կրկնապատկվելու է, կամ դրանք ընդհանրապես վերացվելու են:
Եւս մի հանգամանք, որ տավուշցի «խոպանչիներին» մտահոգում է: Ըստ տարածված լուրերի՝ 2014թ. մայիսից Ռուսաստանում չեն գործելու այլ երկրների քաղաքացիների վարորդական իրավունքների վկայականները, Ռուսաստանում տրանսպորտային միջոց վարելու իրավունք ստանալու համար հարկավոր կլինի այնտեղ քննություն հանձնել: Արտագնա աշխատանքի մեկնողները լավ գիտեն, թե օտարերկրացու համար ինչ է նշանակում այդ երկրում քննություն հանձնելը: Հայ «խոպանչիներից» շատերի աշխատանքը Ռուսաստանում կապված է տրանսպորտային միջոցների հետ. ոմանք ավտոմեքենայով են աշխատատեղ մեկնում, ոմանք էլ աշխատանքի ընթացքում են տրանսպորտ վարում:
Ոսկան ՍԱՐԳՍՅԱՆ
Տավուշը եթե սրտացավ տեր ունենա,որը կմտածի աշխատատեղեր ստեղծելու և ոչ թե եղածն էլ փակելու մասին/Բենտոնիտի օրինակով/,այս մարդկանցից մի քանիսի մտահոգությունն էլ կպակասի:Բայց հավանաբար գնդապետ մարզպետին ու նրա Էլնարա գովերգող խորհրդականին միգուցե պետք է նման արտագաղթը՝աշխատողները գնան,խելացիները գնան,դե իսկ ծույլենրին ու անգրագետներին……………..
Տավուշում ,,գրպանը լցնելու,փող լվանալու,, համար տեր կա,իսկ մարդկաց մասին մտածելու համար՝ տեր չկա:Առհասարակ տեսնես հանրապետությունում ավելի անտեր մարզ կա՞: